Альтэрнатыўнае пасольства Беларусі ў Берліне пачало выдаваць пашпарты
Актывісты беларускай дыяспары ў Германіі пачалі выдаваць у Берліне, побач з афіцыйным пасольствам Беларусі, сімвалічныя пашпарты “свабоднай дэмакратычнай Рэспублікі Беларусь”.
Атрымаць сімвалічны пашпарт можа любы жадаючы. Адзінае патрабаванне — падпісаная заява, што ён не падтрымлівае дыктатуру ні ў якім яе выразе. Уладальнікамі такіх дакументаў ужо сталі каля сотні чалавек, паведамляе dw.com. Паколькі выдача першых пашпартоў будучай дэмакратычнай Беларусі выпала на святочны тыдзень, адзін з арганізатараў альтэрнатыўнай амбасады Тарас Сякерка вырашыў аказваць такога роду консульскія паслугі ў касцюме Дзеда Мароза. На булавешцы яго кія намаляваны гістарычны герб Беларусі “Пагоня”, а накладная барада замяняе абавязковую падчас пандэміі маску.
Сімвалічны пашпарт аформлены ў колерах гістарычнага бел-чырвона-белага сцяга Беларусі. У дакуменце 16 старонак, на якіх указаны прозвішча, імя і імя па бацьку ўладальніка, яго подпіс, інфармацыя аб даце выдачы, пячатка, дадзеныя аб жонцы, дзецях і нават хатніх жывёлах, а таксама спіс краін свету, у якіх ўладальнік ўжо пабываў. Надпіс у пашпарце абвяшчае, што ён прыдатны на працягу ўсяго часу, «пакуль уладальнік дакумента не падтрымлівае дыктатуру».
Сімвалічны беларускі пашпарт даволі падобны да сапраўднага дакумента, таму арганізатары акцыі папярэджваюць, што чырвона-белы пашпарт не мае юрыдычнай сілы. «Наш пашпарт можна і трэба браць з сабой у любы пункт свету. Але не варта прад’яўляць яго ў дзяржаўных органах як дакумент, які сведчыць асобу, гэта можа выклікаць праблемы», — папярэджвае Тарас Сякерка.
Тыя, хто жадае атрымаць сімвалічны пашпарт «свабоднай дэмакратычнай Рэспублікі Беларусь» могуць адправіць заяўку на адрас: [email protected], альбо аформіць дакумент на месцы ля вагончыка-пасольства. З сабою трэба мець толькі стандартную фатаграфію для пашпарта. Плата за афармленне і выдачу дакумента не спаганяецца.
Фота: DW
