Байдэн: ЗША больш не будуць адступаць перад расейскай агрэсіяй
Прэзідэнт ЗША Джо Байдэн у праграмнай прамове ў Дзярждэпартаменце абвясціў пераварот у палітыцы Вашынгтона ў дачыненні да Расеі.
«Мы без ваганняў павялічым выдаткі для Расеі», — заявіў ён.
Прэзідэнт ЗША Джо Байдэн у сваёй праграмнай прамове, прысвечанай контурам яго будучай замежнай палітыкі на пасадзе прэзідэнта, заявіў, што ЗША больш не будуць «адступаць перад агрэсіўнымі дзеяннямі Расеі».
У чацвер, 4 лютага, падчас свайго выступу ў Дзярждэпартамэнце, Байдэн сказаў, што падчас сваёй першай тэлефоннай размовы з расейскім лідарам пасля ўступлення на пасаду ён «даў зразумець» Пуціну, што адносіны мяняюцца.
«Мы без ваганняў павялічым выдаткі для Расеі і абаронім нашы жыццёва важныя інтарэсы і нашых людзей», — заявіў Байдэн.
Прэзідэнт ЗША некалькі разоў згадаў імя расійскага апазіцыянера Аляксея Навальнага, які, па яго словах, павінен быць неадкладна і без усялякіх умоў вызвалены. «Намаганні Расеі ў падаўленні свабоды выказвання меркаванняў і мірных сходаў выклікаюць глыбокую заклапочанасць у нас і ў міжнароднай супольнасці», — дадаў Байдэн.
Па словах Байдэна, палітыка новай адміністрацыі ў дачыненні да Расеі будзе карэнным чынам адрознівацца ад лініі яго папярэдніка Дональда Трампа, які пазбягаў прамой канфрантацыі з Пуціным і спрабаваў пераменшыць агрэсіўныя дзеянні Расіі. «Амерыка вярнулася», — падкрэсліў ён.
