У Кангрэс ЗША ўнесеная рэзалюцыя па Беларусі
У Кангрэс ЗША ўнесеная рэзалюцыя „Падтрымка народа Беларусі і яго дэмакратычных памкненняў і асуджэнне фальсіфікацый выбараў з наступным жорсткім задушэннем мірных дэманстрантаў незаконным рэжымам Лукашэнкі”.
Дакумент унесены кангрэсменамі Уільямам Кітынгам, Марсі Каптур і Браянам Фіцпатрыкам і перададзены ў камітэт па замежных справах. У далейшым ён павінен быць ухвалены Палатай прадстаўнікоў Кангрэса ЗША.
У рэзалюцыі гаворыцца, што Палата прадстаўнікоў не лічыць мінулыя 9 жніўня 2020 года прэзідэнцкія выбары ў Беларусі свабоднымі і справядлівымі і не прызнае Аляксандра Лукашэнку ў якасці легітымнага прэзідэнта краіны.
„Пасля прэзідэнцкіх выбараў беларусы прадэманстравалі сваё цвёрдае жаданне і прыхільнасць да дэмакратычнай будучыні, калі выйшлі на мірныя пратэсты ў Мінску і ва ўсёй краіне, — адзначаецца ў дакуменце. — Беларуская грамадзянская супольнасць на чале са Святланай Ціханоўскай заклікала да адстаўкі Аляксандра Лукашэнкі, мірнай перадачы ўлады і арганізацыі новых, свабодных і справядлівых выбараў”.
У рэзалюцыі канстатуецца, што за мінулыя месяцы адвольныя затрыманні зведалі дзясяткі тысяч грамадзян, у тым ліку журналісты і прадстаўнікі апазіцыі, а праваабаронцы задакументавалі „сотні поўных жаху паведамленняў аб прымяненні катаванняў, сексуальным гвалце і іншым жорсткім абыходжанні з затрыманымі за ўдзел у мірных пратэстах”.
У ёй таксама адзначаецца, што журналісты недзяржаўных СМІ ў Беларусі сутыкаюць з запалохваннем і крымінальным пераследам, а журналісты замежных СМІ былі пазбаўленыя акрэдытацыі. У тэксце, у прыватнасці, згадваюцца блогер Ігар Лосік, журналісткі Кацярына Барысевіч, Кацярына Андрэева, Дар’я Чульцова, якія знаходзяцца ў зняволенні.
У дакуменце падкрэсліваецца, што беларускі народ „мае права вызначаць будучыню Беларусі без непажаданага ўмяшання з боку якіх-небудзь знешніх суб’ектаў, якія парушаюць незалежнасць і суверэнітэт Беларусі”.
Рэзалюцыя асуджае парушэнні правоў чалавека ўладамі Беларусі і заклікае спыніць любыя далейшыя акты гвалту супраць мірных грамадзян.
У дакуменце ўтрымліваецца заклік да неадкладнага вызвалення ўсіх затрыманых за ўдзел у мірных акцыях пратэсту.
„Палата прадстаўнікоў заклікае Аляксандра Лукашэнку і беларускія ўлады да адкрытага і канструктыўнага дыялогу з членамі апазіцыі і іншымі зацікаўленымі бакамі для мірнай перадачы ўлады, — гаворыцца ў рэзалюцыі. — Палата прадстаўнікоў прызнае Каардынацыйную раду, створаную Святланай Ціханоўскай, легітымным інстытутам для ўдзелу ў дыялогу аб мірнай перадачы ўлады”.
У дакуменце таксама ўтрымліваецца заклік да далейшых санкцый у дачыненні да беларускіх уладаў за парушэнні правоў чалавека і фальсіфікацыю выбараў. Адзначаецца, што санкцыі павінны быць узгоднены ЗША, Еўрасаюзам, Вялікабрытаніяй, Канадай і іншымі партнёрамі.
Акрамя таго, рэзалюцыя заклікае разгледзець санкцыі ў дачыненні да „беларускіх дзяржаўных кампаній, якія прама парушылі правы сваіх работнікаў у сувязі з іх удзелам у дэмакратычным руху”.
У ёй таксама ўтрымліваецца заклік да трансатлантычнай супольнасці „разгледзець пытанне аб пераацэнцы любой фінансавай дапамогі, якая аказваецца рэжыму Лукашэнкі, уключаючы ўдзел у эмісіі дзяржаўнага доўгу або кантрактах на закупкі”. Пры гэтым рэкамендуецца павялічыць падтрымку беларускай грамадзянскай супольнасці.
Рэзалюцыя заклікае правесці міжнароднае расследаванне выпадкаў парушэння правоў чалавека ў Беларусі падчас і пасля прэзідэнцкіх выбараў.
У дакуменце таксама гаворыцца аб неабходнасці правядзення новых, свабодных і справядлівых выбараў пад наглядам АБСЕ.
„Палата прадстаўнікоў працягвае падтрымліваць памкненні народа Беларусі да дэмакратыі, правоў чалавека і вяршэнства права і зноў пацвярджае, што рэалізацыя такіх памкненняў з’яўляецца адзіным спосабам забеспячэння далейшага ўмацавання суверэнітэту і тэрытарыяльнай цэласнасці Беларусі”, — адзначаецца ў рэзалюцыі.
Як паведамляў БелаПАН, у снежні мінулага года быў прыняты абноўлены Акт аб дэмакратыі, правах чалавека і суверэнітэце Беларусі, які пашырае паўнамоцтвы прэзідэнта ЗША па ўвядзенні санкцый у дачыненні да Беларусі, у тым ліку ў сувязі „са спрэчнымі прэзідэнцкімі выбарамі і наступнымі рэпрэсіямі з боку ўрада”.
У ліку іншага акт заклікае да правядзення новых прэзідэнцкіх выбараў; прызнае Каардынацыйную раду, створаную па ініцыятыве Святланы Ціханоўскай, у якасці легітымнага інстытута для ўдзелу ў дыялогу аб мірнай перадачы ўлады; заклікае да вызвалення ўсіх палітвязняў; прадугледжвае аказанне дапамогі ў прасоўванні дэмакратыі і падтрымку беларускай грамадзянскай супольнасці; заяўляе пра палітыку ЗША па „непрызнанні ўключэння Беларусі ў „Саюзную дзяржаву” з Расіяй”.
Акрамя таго, на працягу 120 дзён пасля ўваходжання дакумента ў сілу дзяржсакратар ЗША па ўзгадненні з кіраўніком нацыянальнай разведкі павінен накіраваць у адпаведныя камітэты Кангрэса даклад „аб пагрозах, якія Расія ўяўляе для суверэнітэту і незалежнасці Беларусі”.
На працягу 90 дзён пасля ўваходжання дакумента ў сілу кіраўнік Міністэрства фінансаў у супрацоўніцтве з дзяржсакратаром і кіраўніком нацыянальнай разведкі павінен прадставіць даклад аб маёмасці Аляксандра Лукашэнкі. У яго павінны быць уключаныя звесткі аб меркаваных актывах і крыніцах даходу Лукашэнкі і яго найбліжэйшых сваякоў, уключаючы банкаўскія рахункі, інвестыцыйныя актывы і іншыя бізнес-інтарэсы.
