Стала вядома, колькі вадаплаўных птушак зімавалі ў Беларусі
У адрозненне ад мінулай зімы, на гэты раз тыя вадаплаўныя і каляводныя птушкі, што засталіся на зімоўку, адчулі на сабе ўсю крэпасць сапраўдных маразоў. Пра тое, як прайшоў традыцыйны зімовы ўлік гэтых птушак, паведамляе «Ахова птушак Бацькаўшчыны».
У другой палове студзеня падчас правядзення ўліку вадаплаўных і каляводных птушак тэмпература паветра ў краіне апускалася да −20 °С. Большасць вадаёмаў і рэк былі скаваныя тоўстым пластом лёду, таму птушак можна было ўбачыць на адносна невялікай колькасці незамерзлых вадаёмаў.
— Улік птушак праводзіўся ва ўсіх абласцях Беларусі. Нягледзячы на тое што анкет было даслана менш, чым год таму, колькасць улічаных птушак аказалася вышэй. Пераважная большасць асноўных зімовак патрапілі ў поле зроку валанцёраў, — распавялі ў АПБ. — Усяго ўдзельнікамі выяўлена больш за 24 тыс. птушак 37 відаў.
Самыя вялікія канцэнтрацыі зімуючых вадаплаўных птушак адзначаны ў Новалукомлі, Берасці, Менску, Мазыры, Гародні і Барысаве. Больш усё было крыжанак — 16 593, лысух — 3 193 і вялікіх белагаловых чаек — 1 311.
Фота ptushki.org
