З Беларусі забаранілі вывозіць пшаніцу, жыта, кукурузу і грэчку
Уведзеная часовая забарона на вываз пшаніцы і мясліна, жыта, ячменю, аўсу, кукурузы, грэчкі, проса, трыцікале, іншых злакаў. Гэта прадугледжана пастановай Саўміна, паведамляе БелТА.
Забарона будзе дзейнічаць на вываз названых тавараў за межы Беларусі ў дзяржавы-члены ЕАЭС незалежна ад іх краіны паходжання, а таксама за межы мытнай тэрыторыі ЕАЭС.
Забарона не будзе распаўсюджвацца на дадзеныя тавары ў некаторых выпадках. Напрыклад, пры вывазе за межы Беларусі для міжнароднай гуманітарнай дапамогі замежным дзяржавам на падставе рашэнняў урада, а таксама ў якасці запасаў. Выключэнне тычыцца і міжнародных транзітных перавозак.
Пастанова будзе дзейнічаць тры месяцы.
