„Удзельнікі здымак і прымушэння Пратасевіча да інтэрв’ю павінны быць прыцягнутыя да адказнасці”
Паказанае беларускім дзяржтэлеканалам інтэрв’ю Рамана Пратасевіча было зробленае „відавочна пад ціскам і ў зняволенні”, заявіў міністр замежных спраў Вялікабрытаніі Дамінік Рааб.
„Трывожнае інтэрв’ю спадара Пратасевіча ўчора ўвечары было відавочна пад ціскам і ў зняволенні, — напісаў ён у „Твітэры”. — Пераслед тых, хто абараняе правы чалавека і свабоду СМІ ў Беларусі, павінен спыніцца. Тыя, хто ўдзельнічаў у здымках, прымусе і кіраванні інтэрв’ю, павінны быць прыцягнутыя да адказнасці”.
Увечары 3 чэрвеня ў праграме „Маркаў. Нічога асабістага” на ОНТ выйшла інтэрв’ю з затрыманым 23 мая Раманам Пратасевічам — актывістам і рэдактарам тэлеграм-каналаў, прызнаных у Беларусі экстрэмісцкімі.
У інтэрв’ю ён прызнаў сваю віну паводле артыкула 342 КК (арганізацыя або падрыхтоўка дзеянняў, што груба парушаюць грамадскі парадак), а таксама расказаў пра чат, у якім абмяркоўваўся план акцый пратэсту, і назваў прозвішчы ўдзельнікаў чата. Ён расказаў пра канфлікты паміж апазіцыйнымі штабамі, пра ўмовы жыцця, кватэры і дамы, у якіх жывуць дэмакратычныя лідары, а таксама абцякальна — пра фінансаванне іх дзейнасці і ўцягнутасць у гэта еўрапейскіх дзяржаў.
Бацька Пратасевіча ўпэўнены, што яго сына прымусілі даць такое інтэрв’ю. Ён лічыць, што на Рамана рабілі ціск, і не выключае выкарыстання псіхатропаў. Паводле слоў бацькі, па твары сына відаць, што на працягу інтэрв’ю ў яго ішла ўнутраная барацьба паміж тым, што ён хоча сказаць і што мусіць.
„Наш сын у следчым ізалятары КДБ. Там знаходзяцца людзі пад вялікім ціскам. На іх робяць і фізічны, і псіхалагічны націск. Усе, хто знаходзяцца там, чамусьці вельмі хутка даюць прызнанні. Ведаючы нашага сына, мы можам сказаць, што ўсё, што кажа Раман, ён кажа не сам”, — заявіў Дзмітрый Пратасевіч у інтэрв’ю тэлеканалу „Дождь”.
„Няўжо вы думаеце, што Раман, знаходзячыся ў цвярозым розуме і памяці, на 180 градусаў можа змяніць пазіцыю, якую ён займаў месяц таму, два месяцы таму? Рэжысёры добра працуюць, добра паказваюць, але верыць у гэты фільм нельга”, — падкрэсліў бацька блогера.
Ён звярнуў увагу на тое, што на запясцях сына бачныя гематомы ад доўгага нашэння кайданкоў, а таксама адзначыў, што да Рамана не пускаюць адваката і лекараў.
3 мая самалёт Ryanair рэйса Афіны — Вільнюс вымушана сеў у Менску. У аэрапорце паведамілі, што лайнер запытаў пасадку з-за звестак пра бомбу на борце. У Ryanair заявілі, што экіпаж атрымаў інфармацыю аб мініраванні ад беларускіх дыспетчараў, якія далі ўказанне пасадзіць самалёт у Менску. Паводле даручэння Аляксандра Лукашэнкі, для суправаджэння лайнера ў неба паднялі знішчальнік МіГ-29.
Пазней мініраванне не пацвердзілася, але стала вядома пра затрыманне беларускага блогера Рамана Пратасевіча, які знаходзіўся на борце самалёта. На радзіме ён абвінавачваецца згодна з трыма артыкуламі Крымінальнага кодэкса, быў абвешчаны ў міжнародны вышук, улады Беларусі раней накіравалі ў Польшчу запыт аб яго выдачы. Была затрыманая таксама сяброўка Пратасевіча Сафія Сапега, грамадзянка Расеі.
Еўрапейскі савет заклікаў усіх авіяперавозчыкаў, якія базуюцца ў ЕЗ, пазбягаць палётаў над Беларуссю і забараніць палёты беларускіх авіякампаній у краіны Еўразвязу. Аднак яшчэ да гэтага закліку шэраг краін і асобныя авіякампаніі прынялі рашэнне прыпыніць палёты ў Беларусь і транзіт цераз яе тэрыторыю.
На экстранным пасяджэнні рады Міжнароднай арганізацыі грамадзянскай авіяцыі (ICAO) 27 мая было прынятае рашэнне правесці расследаванне інцыдэнту. ICAO павінна падрыхтаваць прамежкавую справаздачу да 25 чэрвеня.
Глядзіце таксама
