TUT.BY падаў пазоў да Адміністрацыі Парку высокіх тэхналогій
TUT.by хоча аспрэчыць пазбаўленне статусу рэзідэнта ПВТ. Сутнасць пазову (яго будзе разглядаць Эканамічны суд Менска): праверка законнасці ненарматыўных актаў, дзеянняў (бяздзеянняў) дзяржорганаў і службовых асоб.
Нагадаем, у ТАА «Тут бай медыя» адабралі статус рэзідэнта ПВТ паралельна з завядзеннем супраць службовых асобаў партала крымінальнай справы па абвінавачванні ў «падатковых махінацыях».
Сітуацыю вакол TUT.by у ДФР КДК каментавалі так: «Для рэзідэнтаў [ПВТ] важна, каб яны аказвалі паслугі з выкарыстаннем ПА ўласнай распрацоўкі. У дадзеным выпадку «Тут бай медыя» выкарыстала іншае спецыялізаванае ПА, атрымлівала выручку за кошт гэтай дзейнасці, што з’яўляецца недапушчальным для рэзідэнтаў. У выніку таварыства ухілілася ад выплаты падаткаў, сума шкоды вылічаецца мільёнамі долараў».
TUT.by жа паказваў сярод іншага на тое, што за час працы кампаніі ў ПВТ яна рэгулярна рабіла справаздачу перад Адміністрацыяй Парку, паспяхова праходзіла праверкі і аўдыты, якія не выяўлялі ніякіх парушэнняў, і прэтэнзій да праекту не ўзнікала.
