16 ліпеня – новая хваля ператрусаў у Беларусі (абнаўляецца)
У Беларусі ні на дзень не спыняецца хваля ператрусаў у кватэрах грамадскіх актывістаў і журналістаў.
Затрыманы журналіст і праваабаронца з Рэчыцы Андрэй Мядзведзеў.
У Калінкавічах, дзе ў Андрэя кватэра, быў вобшук. Як мінімум адзін з тых, хто затрымліваў — супрацоўнік КДБ.
Адбыўся ператрус у гомельскага журналіста-фрылансера Андрэя Толчына. У гомельскай журналісткі Ларысы Шчыраковай таксама пабывалі з ператрусам „няпрошаныя госці”.
З самай раніцы сілавікі прыйшлі з вобшукамі да беларускіх журналістаў наўпрост ці ускосна звязаных з Радыё Свабода і тэлеканалам «Белсат». Не менш за 15 чалавек знаходзіліся ля офіса «Радыё Свабода» і спрабавалі ўзламаць уваходныя дзверы У выніку дзверы выламалі, затрыманы журналіст Алег Груздзіловіч. «Алега забралі ў кайданках. Было 9 чалавек Забралі ўсю тэхніку», – расказала яго жонка Мар’яна. У офісе Свабоды сарваныя камеры відэаназірання.
Затрымалі журналіста з Івацэвічаў Сяргея Скулаўца. Ранкам да яго дамоў прыехаў мікрааўтобус – і Сяргея забралі імаверна супрацоўнікі міліцыі. Апошнія 5 гадзінаў сувязі з ім няма.
Як напісаў у сваім Фэйсбук журналіст Ян Роман, ператрус ідзе ў яго калегі ў Гародні – фотажурналіста Аляксандра Саенкі.
16 ліпеня з раніцы прадстаўнікі ўладных структураў прыйшлі з ператрусамі да журналіста і вядучага праграмы «Кожны з нас» Глеба Лабадзенкі, журналісткі Галіны Абакунчык і журналіста і краязнаўца Яўгена Меркіса. Яны паспелі паведаміць пра гэта ў сваіх акаўнтах фэйсбуку.
Таксама сілавікі з раніцы, як інфармуе Еўрарадыё, у кватэру журналіста Ігара Ільяша, мужа палітзняволенай рэпартэркі «Белсату» Кацярыны Андрэевай.
Таксама з раніцы ператрусы адбываюцца ў гарадзенскага журналіста Аляксея Кайрыса, журналісткі Хрысціны Чарняўскай, прыйшлі сілавікі і да гарадзенскага журналіста і грамадскага дзеяча Паўла Мажэйкі.
Таксама ператрус у журналіста Радыё Свабода Валянціна Жданко.
Затрымалі журналістку Інэсу Студзінскую (у кастрычніку ў яе забралі акрэдытацыю карэспандэнта Радыё Свабода). У яе кватэры быў ператрус, паведамляе яе сын.
Беларускае Радыё Рацыя
