Агляд прэсы: ракеты, пажары і гумовыя качкі
Ізраільскія ваенныя нанеслі ўдар у адказ па аб’ектах ХАМАС. У Малдове зацвердзілі новы ўрад. У Эфіопіі паўстанцы захапілі аб’ект культурнай спадчыны ЮНЕСКА.
Падрабязнасці свежых матэрыялаў замежнай прэсы даведаемся ў аглядзе Антона Разумоўскага:
– Армія абароны Ізраіля атакавала аб’екты руху ХАМАС у сектары Газа ў адказ на запуск адтуль шароў з выбухоўкай. Пра гэта паведамляе Армія абароны Ізраіля, піша агенства УНП.
„У адказ на бесперапынныя запускі шароў з выбухоўкай з Газы ў Ізраіль мы нанеслі ўдар па ваеннаму комплексу ХАМАС і ўсталёўцы для запуску ракет. Усталёўка знаходзілася ў жылым раёне, што яшчэ раз падкрэслівае, наколькі ХАМАС падвяргае небяспецы палестынскіх мірных жыхароў”, – гаворыцца ў паведамленні арміі абароны Ізраілю ў Twitter. Мясцовыя СМІ паведамляюць, што жыхары палестынскага анклава і ізраільскіх суполак паблізу мяжы паведамілі, што чулі выбухі ў паўночнай частцы сектара Газа. У дадатковых паведамленнях палестынскіх СМІ гаворыцца, што сябры ХАМАС адкрылі агонь з кулямётаў па ізраільскіх самалётах.
У пачатку траўня адбыўся канфлікт паміж групоўкамі ў сектары Газа і Ізраілем, які абвастрыўся пасля таго, як ізраільскія ўлады па рашэнні суда пачалі высяляць некалькі арабскіх сем’яў ва Усходнім Ерусаліме.
З-за гэтага ў горадзе пачаліся пратэсты, перарослыя ў сутыкненні палестынскага насельніцтва і ізраільскай паліцыі. Пазней з сектара Газа пачаліся ракетныя абстрэлы па тэрыторыі Ізраіля і ўдары ў адказ. Затым інтэнсіўныя абстрэлы сціхлі і сталі адзінкавымі.
У Малдове зацвердзілі новы ўрад
Парламент Малдовы зацвердзіў новы ўрад, які ўзначаліць Наталля Гаўрыліца. Пра гэта піша News Maker. За праграму кандыдата і яго каманду прагаласаваў 61 дэпутат. „Мы абяцаем, што адразу прыступім да працы!” – заявіла Гаўрыліца. У новым Кабінеце будзе 13 міністэрстваў, а не дзевяць, як гэта было ў апошнія гады. Асобнымі ведамствамі зноў стануць міністэрства аховы здароўя, міністэрства працы і сацыяльнай абароны, міністэрства адукацыі, міністэрства культуры, міністэрства транспарту і міністэрства рэгіянальнага развіцця і інфраструктуры. Акрамя таго, ва ўрад вернуць міністэрства навакольнага асяроддзя.
Пажары ў Грэцыі: загінулі два чалавекі
У Грэцыі ў выніку некантраляваных лясных пажараў загінулі два чалавекі, шэсць раёнаў краіны прыведзены ў рэжым павышанай гатоўнасці, піша ВВС. Велізарныя клубы дыму бачныя над паўночнай ускраінай Афін, дзе людзей заклікаюць пакінуць свае дамы. 38-гадовы пажарны-добраахвотнік загінуў ад падзення слупа электрычнасці ў прыгарадзе сталіцы.
Яшчэ адной ахвярай пажару стаў прэзідэнт Афінскай гандлёвай палаты Канстанцінас Міхалас. Ён быў знойдзены без прытомнасці на фабрыцы непадалёка ад таго месца, дзе бушаваў пажар. Яшчэ 20 чалавек параненыя. У пятніцу з грэчаскай выспы Эвія праз пажар эвакуявалі 653 чалавекі. Прычынай пажараў у Грэцыі стала анамальная спякота. Тэмпература ў краіне павялічылася да 45 ° C. Хоць у многіх гарадах Грэцыі ўпершыню амаль за 10 дзён тэмпература знізілася да 40 ° C, у большай частцы краіны прагназуюць моцныя вятры, якія могуць ўскладніць тушэнне полымя. Зараз больш за 1000 пажарных і каля 20 самалётаў змагаюцца з агнём па ўсёй Грэцыі. Некаторыя еўрапейскія краіны накіроўваюць на дапамогу сваіх пажарных, а таксама самалёты, верталёты і аўтамабілі.
У Эфіопіі паўстанцы захапілі аб’ект культурнай спадчыны ЮНЕСКА
Тыграйскія сепаратысты захапілі эфіёпскі горад Лалібэла, які з’яўляецца аб’ектам культурнай спадчыны ЮНЕСКА. Паводле дадзеных эфіопскага ўрада, людзі масава пакідаюць захоплены паўстанцамі горад. Пра гэта паведамляе BBC News. У Лалібэле размешчаны ўнікальныя маналітныя храмы XIII стагоддзя, выразаныя непасрэдна ў скалах. Дзяржаўны дэпартамент ЗША заклікаў паўстанцаў захаваць культурную спадчыну горада. Горад Лалібэла размешчаны ў суседняй з Тыграем эфіопскай правінцыі Амхара. Паўстанцы захапілі яго ў выніку уцёкаў эфіопскіх войскаў, якія пацярпелі паразу ў бітве за сталіцу Тыграя – Мэкэле. Канфлікт паміж Тыграем і цэнтральным урадам Эфіопіі ўспыхнуў у лістападзе 2020 года. Прычынай вайны, якая забрала жыцці больш за 10 тысяч чалавек, паслужылі супярэчнасці паміж федэральным цэнтрам і ўладамі правінцыі датычна размежавання ўладных паўнамоцтваў і прызнання мясцовых выбараў.
Байдэна папрасілі не наведваць акцыі памяці тэракту 11 верасня
Сваякі ахвяраў тэракту 11 верасня 2001 году ў Нью-Ёрку папрасілі прэзідэнта ЗША Джо Байдэна не наведваць акцыі памяці ў 2021 годзе. Пра гэта паведамляе тэлеканал NBC. Да заявы далучыліся 1,8 тысячы сваякоў загінулых, супрацоўнікаў экстранных службаў і тых, хто выжыў у катастрофе грамадзян. Яны заклікалі Байдэна адмовіцца ад візітаў на памятныя мерапрыемствы ў гонар 20-годдзя з дня трагедыі, калі ён не стрымае сваё абяцанне рассакрэціць шэраг дадатковых дадзеных пра тэракт. Гаворка ідзе пра дакументы, у якіх нібыта ўтрымліваюцца доказы сувязі уладаў Саудаўскай Аравіі з падзеямі 11 верасня.
11 верасня 2001-га ў ЗША адбыўся самы буйны тэракт у сучаснай гісторыі. Два самалёты ўрэзаліся ў вежы Сусветнага гандлёвага цэнтра ў Нью-Ёрку, трэці ўпаў на будынак Пентагона і яшчэ адзін разбіўся ў ваколіцах Шанксвіла ў Пенсільваніі. У выніку загінулі 2976 чалавек, больш за чатыры тысячы былі параненыя.
У Чыкага скінулі ў раку 70 тысяч гумовых качак
У Чыкага прайшоў дабрачынны заплыў, падчас якога ў раку скінулі некалькі дзясяткаў тысяч гумовых качак. Пра гэта паведамляе газета Chicago Sun-Times. Акцыя была арганізавана некамерцыйнай дабрачыннай арганізацыяй Special Olympics Illinois, якая праводзіць спаборніцтвы для людзей з абмежаванымі інтэлектуальнымі магчымасцямі. Прыняць удзел у дэрбі мог любы жадаючы – для гэтага трэба было набыць качку за пяць даляраў. Скінутыя з маста цацкі даплылі да фінішнай рысы праз пластыкавы тунэль з дапамогай берагавой аховы. Па словах каардынатара мерапрыемства Аляксандра Макмілана, у агульнай складанасці было прададзена 70 тысяч качак і сабрана звыш 310 тысяч даляраў. Дадзеныя сродкі накіруюць на дабрачыннасць. Уладальнікі самых хуткасных качак атрымалі прызы. Пераможцу дастаўся аўтамабіль Chevrolet Trailblazer 2021 года выпуску. Прызёры атрымалі паездку ў Мексіку па сістэме «ўсё ўключана» і дзве тысячы даляраў адпаведна.
Беларускае Радыё Рацыя
Фота: AFP
