Анонс перадачы „З Падляшша родам”: Марыя Урублеўская
Моцны, чароўны голас, тонкае адчуванне прыроды і паэзіі – так можна коратка ахарактарызаваць чарговую гераіню перадачы з серыі « З Падляшша родам. Месцы. Падзеі. Людзі”.
Валя Лаеўская запрашае на сустрэчу з Марыяй Урублеўскай з дому Прышчэпко родам з Баброўнікаў.
– Цаню жыццё, люблю жыццё, люблю людзей. А калі я адна, то я люблю спяваць. Родам я з Баброўнікаў. Граніца там была, таму можа і беларуская мова так проста пайшла ў нас. Па-просту гаварылі людзі ў вёсцы. Сустракаліся і з загранічнымі беларусамі. Бо сена калісьці ўсе нарыхтоўвалі пры рэчцы Свіслачы. Усе размаўлялі. Не было такой нянавісці, як цяпер, што палітыкі нашыя робяць скрозь. І мне проста ў кроў увайшлі спевы. Мая мама спявала. Мой татка падспеўваў. І мама навучыла мяне ўсялякім песням.
Марыя Урублеўская не толькі спявае, яна сама складае словы і музыку да сваіх песняў. Таму яны вельмі асабістыя. Марыя Урублеўская прызёр фестываляў “Беларуская песьня”, а таксама сябра музычнага калектыву «Разсьпяваны Гарадок». Больш пра Марыю Урублеўскую, пра яе захапленні і жыццё слухайце ўжо ў бліжэйшую нядзелю ў 12.05 і 20.05 на хвалях Беларускага Радыё Рацыя.
Беларускае Радыё Рацыя
