Пачаўся афіцыйны візіт Святланы Ціханоўскай у Францыю
Лідар дэмакратычнай Беларусі Святлана Ціханоўская наведвае Францыю. Яна ўжо паўдзельнічала ў Парыжы ў адкрыцці выставы пра год беларускіх пратэстаў вачыма фотажурналістаў.
Яе словы цытуе прэсавая служба: „Праз фатаграфіі збітых і закатаваных беларусаў я таксама стукаюся ва ўсе дзверы, пераконваючы сусветных палітыкаў у тым, што наша барацьба рэальная і блізкая”.
Святлана Ціханоўская наведвае Францыю на запрашэнне міністра замежных спраў гэтай краіны Жан-Іва Ле Дрыяна.
Беларуская госця сустрэнецца з прадстаўнікамі беларускай дыяспары, выступіць перад студэнтамі Інстытута палітычных даследаванняў. Запланаваныя сустрэчы з прэзідэнтам Канстытуцыйнага савета Ларанам Фабіусам, мэрам Парыжа і кандыдатам у прэзідэнты Францыі Ан Ідальго, старшынёй Сената Жэрарам Ларшэ, старшынёй Камітэта па замежных справах Нацыянальнага сходу Франсуа Байру.
Ціханоўская абмяркуе з палітыкамі арганізацыю канферэнцыі высокага ўзроўню па рашэнні крызісу ў Беларусі, а таксама ўдзел дэмакратычных сіл Беларусі ў саміце Усходняга партнёрства.
Тэмамі перамоваў стануць таксама дапамога грамадзянскай супольнасці і міжнароднае расследаванне супраць рэжыму Лукашэнкі за злачынствы супраць чалавечнасці.
Францыя з’яўляецца пастаянным чальцом Рады бяспекі ААН, а з 1 студзеня 2022 года пачне сваё старшынства ў ЕЗ. Візіт Святланы Ціханоўскай працягнецца да 17 верасня.
Беларускае Радыё Рацыя
