Да золатавалютных рэзерваў дадалося амаль 90 млн даляраў. Адкуль грошы?
Золатавалютныя рэзервы Беларусі ў кастрычніку папоўніліся на 89,8 млн даляраў і на 1 лістапада 2021 года склалі 8,55 млрд даляраў, паводле звестак Нацбанка.
Myfin.by паказвае, як мяняліся рэзервы краіны з пачатку года.
У кастрычніку выплаты Беларусі па знешнім доўгу скараціліся амаль удвая да 175 млн даляраў, а сітуацыя на ўнутраным валютным рынку дазволіла Нацбанку скупляць лішкі валюты. Гэта прывяло да росту ЗВР да рэкорднага сёлета ўзроўню. Да канца года Нацбанкам запланаваны аб’ём ЗВР не ніжэй за 6 млрд даляраў. Відавочна, што гэты паказчык удасца выканаць з вялікім запасам.
Самага нізкага значэння ў 2021 годзе ЗВР дасягалі 1 сакавіка, апусціўшыся да 6,9 млрд даляраў. ЗВР неабходныя краіне для згладжвання ваганняў курсу нацыянальнай валюты і гарантыі выплат па вонкавым абавязку.
Паводле традыцыйных ацэнак эканамістаў, абʼём ЗВР павінен складаць 3-5 месячных абʼёмаў імпарту. Паводле аператыўных звестак Белстата, сярэднямесячны імпарт у 2021-м склаў 3181 млн даляраў. Такім чынам ЗВР пакрываюць менш 3 месячных абʼёмаў імпарту і ўсё яшчэ не дацягваюць да ніжняй мяжы дастатковасці.
Яшчэ адзін крытэрый ацэнкі ЗВР: іх абʼём павінен перавышаць знешні дзярждоўг. Па дадзеных Мінфіна, знешні дзяржаўны доўг Беларусі на 1 верасня 2021 дасягнуў 18,2 млрд даляраў, што перавышае абʼём ЗВР у 2,1 разы.
Тым не менш, бягучае значэнне ЗВР знаходзіцца на двухгадовым піку.
Паводле zautra.by
