Медыянны беларус жыве на 645 рублёў на месяц
Гэта вынікае са статыстычных даных пра жыццю хатніх гаспадарак краіны ў 2021 годзе. Узровень забяспечанасці моцна адрозніваецца па тэрыторыях.
Кожны квартал улады арганізуюць выбарачнае абследаванне беларусаў па ўзроўні жыцця. Абследаванне называецца выбарачным, бо ахоплівае не ўсё насельніцтва, а выбарку з некалькіх тысяч сем’яў. Гэтыя людзі адабраныя такім чынам, каб максімальна дакладна прадстаўляць структуру насельніцтва паводле звестак перапісу.
Адной з разліковых адзінак абследавання выступае хатняя гаспадарка. Хатняя гаспадарка — гэта чалавек або група людзей, якія пражываюць сумесна, вядуць агульную гаспадарку і забяспечваюць сябе ўсім неабходным для жыцця. У бытавой лексіцы аналаг хатняй гаспадаркі — гэта сям’я.
Кожная хатняя гаспадарка і асобны чалавек маюць рэсурсы. Па выніках 3 квартала 2021 года гэтыя рэсурсы на 95,2 працэнта былі прадстаўлены грашыма, на 4,1 працэнта — прадуктамі з асабістай падсобнай гаспадаркі і на 0,7 працэнта — натуральнымі льготамі і выплатамі. Выходзіць, што за нязначным выключэннем наяўныя рэсурсы беларусаў — гэта грошы.
У 3 квартале 2021-га ў сярэднім на 1 чалавека прыпадала 775 рублёў рэсурсаў у месяц. Інакш кажучы, сярэдні (не медыянны!) беларус мог патраціць на жыццё такую суму або максімальна блізкую да яе. У гарадах і пасёлках гарадскога тыпу сярэднія рэсурсы на чалавека склалі 803 рублі на месяц, у сельскай мясцовасці — 681 рубель, у Менску — 985 рублёў, у абласцях — ад 628 па Магілёўскай да 773 па Менскай. Апошняе месца Магілёўшчыны звязана з аўтсайдэрскімі пазіцыямі гэтага рэгіёна па сярэднім заробку. Таксама ў Магілёўскай вобласці самы нізкі ў краіне гадзінны заробак і самая высокая працягласць працоўнага часу.
У сваю чаргу, нізкія заробкі абумоўлены складаным фінансавым становішчам флагманскіх прадпрыемстваў рэгіёна. Па выніках 9 месяцаў каля 23,8% флагманаў Магілёўскай вобласці мелі рэнтабельнасць продажаў ніжэйшую за нуль, а яшчэ 43,3% — у межах 0 — 5%.
Узровень рэсурсаў на чалавека моцна залежыць ад колькасці дзяцей у сям’і: чым іх больш, тым сярэдняя планка ніжэйшая. У хатніх гаспадарках без дзяцей да 18 гадоў рэсурсы на чалавека дасягнулі 877 рублёў на месяц, а ў хатніх гаспадарках з 1 дзіцем — 711 рублёў, з 2 дзецьмі — 620, з 3 і больш дзецьмі — 504.
Памер душавых рэсурсаў у 10% найбольш забяспечаных хатніх гаспадарак у 3 квартале склаў 2178 рублёў на месяц, а ў 10% найменш забяспечаных — 326 рублёў. У малазабяспечаных хатніх гаспадарках сярэдні ўзровень яшчэ ніжэйшы — 248 рублёў на чалавека ў месяц. Пры гэтым у 3 квартале сярэдні бюджэт пражытачнага мінімуму на чалавека роўны 285,4 рубля на месяц.
Медыянныя рэсурсы на чалавека ў Беларусі меншыя за сярэднія. Па выніках 3 квартала яны склалі 645 рублёў на месяц па краіне, у тым ліку па гарадской мясцовасці — 666 рублёў, па сельскай — 597 рублёў. Па Менску медыяна склала 776 рублёў на душу ў месяц, па абласцях — ад 564 па Магілёўскай да 644 па Гарадзенскай і Менскай.
