Школы Падляшша пачалі прымаць дзяцей уцекачоў з Украіны
У нашым эфіры дырэктар ІІ Агульнаадукацыйнага ліцэю з беларускай мовай навучання імя Браніслава Тарашкевіча ў Бельску-Падляшскім Андрэй Сцепанюк.
РР: Ці трапілі дзеці з Украіны ў вашую навучальную ўстанову?
Андрэй Сцепанюк: Так, з учарашняга дня дзве дзяўчынкі ў нас пачалі навучацца. Таксама ў некалькіх чалавек распытваем, наколькі ёсць магчымасць, каб вучыцца ў ліцэі.
РР: Часта гэтыя маладыя людзі перажылі вялікія жахі вайны. Невядома да канца, што яны бачылі, што чулі, з чым ім прыйшлося сустрэцца. Ці ёсць нейкія падказкі вашым вучням з Міністэрства адукаці, як паводзіць сябе з імі, як ім дапамамагчы, як іх інтэграваць?
Андрэй Сцепанюк: Міністэрства адукацыі і навукі фактычна з пачатку вайны ва Украіне амаль кожны дзень дасылае дапаможнікі і інфармацыю на старонках сайту. І трэба сказаць, што ўсё мяняецца з кожным днём. Пакуль што ёсць распараджэнні, якія гавораць, якім чынам прымаць тых маладых людзей з Украіны. І тут трэба сказаць, што даволі проста гэта можна зрабіць. Цяпер такога чалавека можам прыняць кожны дзень без погляду на тое, ці гэта пачатак навучальнага года, ці не. Таксама ён не мусіць мець дакументаў. Я, напрыклад, размаўляў з тымі дзяўчатамі, якія знаходзяцца ў нашай школе, яны проста як стаялі, так выехалі. Адная з іх паходзіць з Харкава, дзе ўвесь час ідуць бамбардзіроўкі.
Таксама на старонках сайта Міністэрства адукацыі з’яўляюцца дапаможнікі самім уцекачам з Украіны, бо яны ёсць і на ўкраінскай мове, а таксама педагогам і настаўнікам тут у нас. Адзін з іх называецца “Як размаўляць з дзецьмі пра вайну ва Украіне. Рэкамендацыі для педагогаў.” Таму такіх дапаможнікаў вельмі многа, і калі нехта хоча імі скарыстацца, то можа гэта зрабіць. Але самае важнае – гэта прыняць тых маладых людзей вельмі цёпла. Мы іх прымаем як сваіх у школе і стараемся даць ім хоць крышку надзеі на лепшае.
Цалкам гутарка ў далучаным файле:
Беларускае Радыё Рацыя
