Акцыя салідарнасці з Беларуссю і Украінай у Беластоку (абноўлена)
Ля консульства Беларусі ў Беластоку ў нядзелю адбылася акцыя салідарнасці з Беларуссю і Украінай. Галоўная тэма публічнага сходу – падтрымка палітвязняў у Беларусі, колькасць якіх пастаянна расце: рызыка стаць палітвязнем існуе для кожнага жыхара Беларусі.
Cваімі меркаваннямі падзяліліся ўдзельнікі акцыі:
– Мы прыйшлі, каб падтрымаць нашых палітвязняў, паказаць, што мы не здаемся і ніколі не здадзёмся, мы будзем працягваць барацьбу, пакуль дыктатар не сыйдзе. Каб яны разумелі, што яны не адны.
– Гэта час, калі мы можам прыйсці і падтрымаць Украіну.
– Самае страшнае тое, што мы ўсялякімі спосабамі намагаемся іх падтрымаць, пішам лісты вязням, але адказаў зусім няма з іх боку.
– Там зараз дастаткова слова – і станеш палітычным вязнем.
– Мы прыйшлі падтрымаць наш брацкі народ, нашых братоў-украінцаў
– Рады бачыць тут беларусаў, якія прыйшлі.
Па словах арганіазатараў акцыі, падобная акцыя не апошняя. Мітынгі і спалучаныя з імі зборы сродкаў для беларускіх добраахвотнікаў ва Украіне ад беларускай дыяспары ў Беластоку будзе працягвацца і надалей.
***
Ля консульства Беларусі ў Беластоку адбылася акцыя салідарнасці з Беларуссю і Украінай. Галоўная тэма публічнага сходу – падтрымка палітвязняў у Беларусі, колькасць якіх пастаянна расце: рызыка стаць палітвязнем існуе для кожнага жыхара Беларусі. Акрамя таго ля будынка консульства абноўлены стыхійны мемарыял у памяць асобаў, якія загінулі ў Беларусі падчас пратэстаў 2020 году.
Асобная пляцоўка ля консульства – месца збору рэчаў і сродкаў для беларускага палка „Пагоня”, які далучыўся да міжнароднага легіёна Узброеных сіл Украіны. Можна прыносіць гігіенічныя наборы, новую ніжнюю бялізну для мужчын, трэкінгавыя шкарпэткі, коўдры з фальгі, паўэрбанкі, батарэйкі ААА, пары стэрыльных хірургічных пяльчатак, энергетычныя батончыкі і БЧБ сцягі.
Гучыць успамін пра палітзняволеных Беларусі. „Гэта наш боль, яны сядзяць у нечалавечых варунках. Людзі, якія думаюць інакш, зняважаны.”
Агучана дапамога беларускай дыяспары на карысць беларускіх добраахвотнікаў ва Украіне.
Працуе вольны мікрафон. Гучыць заклік рабіць усё мажлівае ў варунках зацягнутай вайны ва Ўкраіне і палітычнага крызісу ў Беларусі. У тым ліку ўдзел у акцыях, напісанне лістоў палітвязням. Прыводзіцца лічба 80 дыверсій на чыгунцы Беларусі супраць перасоўвання расейскай зброі.
Людзі падносяць рэчы і грошы на карысць палка „Пагоня”.
Прысутныя ўпэўнены, што месца Беларусі і Украіны – у Еўразвязе. Ёсць і тыя, хто за абсалютна незалежны шлях беларускага народу ў свеце.
Прысутныя ўкраінцы словамі падтрымалі пабрацімаў у барацьбе, выказалі салідарнасць палітвязням. Гучаць расповеды пра ўкраінскіх сваякоў беларусаў ва Украіне.
Агучваецца сітуацыя ў Беларусі і формы пратэсту, якія яшчэ мажлівыя, і ў большасці – пасіўныя.
Нават самыя нязначныя ўчынкі беларусаў у сукупнасці дадуць эфект. Беларусы мусяць адчуць адказнасць за будучыню краіны! Наступае момант, калі людзі ў Беларусі могуць прачнуцца ў такой жа жудасці, як і ўкраінцы.
Мітынг завершаны. Збор рэчаў і сродкаў – працягваецца. Арганізатары запэўнілі ў дастаўцы сабранага ва Украіну для палка „Пагоня”.
Беларускае Радыё Рацыя, Беласток
