Агляд прэсы: кашмарны сцэнар для Крамля
Расейская вайна ва Украіне «можа спыніцца ў траўні-чэрвені». Штайнмаера ў Кіеве не чакаюць. Схемы «абельвання» расейскай нафты. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
«Вайна Расеі супраць Украіны можа прыпыніцца ў траўні-чэрвені 2022 года», – цытуе украінскае выданне The New Voice of Ukraine гендырэктара інфармацыйнага агенцтва «Інтэрфакс-Украіна» Аляксандра Мартыненку. Прынамсі Мартыненка камэнтуе вынікі сустрэчы Пуціна з Лукашэнкам у Дзень касманаўтаў і выводзіць ролю Беларусі ва ўкраінска-расейскай вайне:
«Час ад часу Пуцін любіць пакпіць з Лукашэнкі і выставіць яго ў нявыгадным святле. Так Пуцін прымусіў Лукашэнку ляцець у Амурскую вобласць на 12 гадзін. Усё пачалося з таго, што Лукашэнка падумаў, што можа быць лідарам Еўразійскага саюзу Беларусі і Расеі. Лукашэнка жыў усе гэтыя 20 гадоў, спрабуючы падмануць расейскае кіраўніцтва, абяцаючы яму бог ведае што, атрымліваючы за гэта грошы. Але эпахальныя, вызначальныя рашэнні прымаюцца не падчас сустрэч, а на полі бою. Канешне, у Беларусі больш камфортна весці перамовы, чым у Турцыі, пад рознымі прыстасаваннямі, размешчанымі людзьмі Эрдагана ва ўсіх памяшканнях.
З пункту гледжання Расеі, перамовы могуць прынесьці вынікі двух разнавіднасьцяў: да перамогі ці пасьля перамогі. Умоўна – пасля ваеннага разгрому праціўніка. Лічыцца, што перамовы могуць быць найбольш эфектыўнымі для іх на гэтых двух этапах. Цяпер няма ні таго, ні другога: ні разумення, што безумоўная перамога будзе гарантавана, ні дасягненняў.
Трэці момант — армія павінна пакласці на стол Пуціна нешта сапраўднае, каб паказаць людзям. Прынамсі для сябе. Данецкая і Луганская вобласці ў сваіх адміністрацыйных межах – гэта, вядома, не перамога Расеі, але хоць нешта.
Украінска-расейская вайна можа дайсьці да такой стадыі ў траўні-чэрвені, калі стане ясна, што Расея ня здолее зрабіць усё, што задумала, і Украіна ня зможа выбіць расейскія войскі са сваёй тэрыторыі. Потым, вядома, будзе паўза, якую трэба будзе выправіць. Можа адбыцца – альбо перамір’е, альбо больш-менш стабільны мір», – падсумоўвае украінскае выданне.
У сераду ўвечары кіраўнікі дзяржаў Літвы, Латвіі, Эстоніі і Польшчы сустрэліся ва Украіне для перамоваў з прэзідэнтам Зяленскім, каб сваім візітам падаць сігнал аб падтрымцы і салідарнасці. Пры гэтым напярэдадні вечарам стала вядома, што прэзідэнту Германіі Штайнмаеру ў Кіеве відавочна не рады. Аглядальнікам зразумелыя прычыны такога кроку з боку Кіева. Харвацкі паартал Telegram.hr крытыкуе федэральнага прэзідэнта за занадта позняе прасвятленне.
«Штайнмаер, які на працягу ўсёй сваёй палітычнай кар’еры выступаў за збліжэнне Расеі і Захаду, цяпер заяўляе, што, маўляў, ён няправільна ацаніў Пуціна і не верыў, што расейскі прэзідэнт «змірыцца з поўным эканамічным, палітычным і маральным крахам сваёй краіны ў імя ўласнага імперскага вар’яцтва». Ён таксама прызнаў, што зрабіў памылку, падтрымаўшы «Паўночны паток-2» – газаправод, закліканы падвоіць пастаўкі расейскага газу ў Германію. Берлін прыняў рашэнне спыніць праект толькі пасля ўварвання Расеі ва Украіну», – падкрэслівае харвацкае выданне.
На сустрэчы міністраў замежных спраў ЕЗ, якая прайшла ў панядзелак, не ўдалося дасягнуць агульнай дамоўленасці аб нафтавым эмбарга супраць Расеі. Аднак, паводле слоў Вярхоўнага прадстаўніка ЕЗ па замежных справах і палітыцы бяспекі Жазэпа Барэля, гэты варыянт не выключаецца. Некаторыя санкцыі цалкам можна абысці, ужыўшы творчы падыход, адзначае еўрапейская прэса.
Расейская газета Кoммерсант прадракае хітрыкі з боку нафтавікоў па пазбяганні санкцый, прычым прыкладам тут стануць Іран і Венесуэла.
«Схемы з мяшаннем паліва цяпер могуць выклікаць усмешку, яны, верагодна, стануць толькі правобразам больш маштабных аперацый, закліканых „абяліць” расейскую сыравіну. Гружаныя танкеры з выключанымі транспондэрамі пад покрывам ночы будуць пакідаць расейскія парты, каб у моры пераваліць груз на нейтральнае судна нібы з казахстанскай (або нарвежскай, або саудаўскай) нафтай. Танкеры і іх уласнікі, западозраныя ў падобных дзеяннях, будуць трапляць пад санкцыі, на іх месца прыйдуць новыя судны і людзі, а выдаткі аперацый будуць пакрывацца за кошт дысконту расейскай нафты да сусветнай цаны», – піша расейскае выданне.
Прэм’ер-міністры Швецыі і Фінляндыі сустрэліся ў Стакгольме, каб абмеркаваць як змянілася становішча ў сферы бяспекі, выкліканае вайной ва Украіне. Пры гэтым размова ішла ў тым ліку і аб магчымым уступленні гэтых да гэтага часу нейтральных краін у НАТО. Кіраўнік урада Фінляндыі Сана Марын заявіла аб тым, што ясна, што нішто не можа прапанаваць такіх гарантый бяспекі, як 5-ы артыкул Паўночнаатлантычнага дагавора. Прыняцце рашэння чакаецца да канца чэрвеня.
«Фінляндыя была б вельмі прывабным кандыдатам на ўступленне ў заходні ваенны альянс», – такое меркаванне румынскай газеты Adevărul.
«Калі Фінляндыя падасць заяўку на сяброўства, то спраўдзіцца адзін з кашмарных сцэнараў Расеі: у яе з’явяцца дадатковыя 1340 км мяжы з НАТО. Фінляндыя стала б раўнапраўнай магутнай часткай НАТО, а не той краінай-сябрам, якая ўвесь час просіць ва ўсіх дапамогі і валодае састарэлымі і неэфектыўнымі сістэмамі ўзбраенняў. Дастаткова ўзгадаць, што Фінляндыя замовіла летась 64 знішчальнікі F-35 і, як нядаўна заявіў былы прэм’ер-міністр Аляксандр Стуб, пры насельніцтве ў 5,5 млн. чалавек краіна мае рэальную і аператыўную магчымасць мабілізацыі ад 280 000 да 300 000 вайскоўцаў», – адзначае румынскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
