Міністр працы прызнала, што з прычыны санкцый беларусы губляюць працу
Міністр працы і сацыяльнай абароны Ірына Касцевіч распавяла пра сітуацыю на рынку працы ва ўмовах санкцый на тэлеканале „Беларусь 1”.
“…У сакавіку-красавіку мы бачым рост вымушанай няпоўнай занятасці, прастояў. Калектывы перабудоўваюць сваю працу. Мы перайшлі на штотыднёвы маніторынг. У нас ёсць унутраныя галіновыя штабы, каб, убачыўшы праблему ў канкрэтным калектыве, аператыўна падключыцца да яе вырашэння”, — сказала Ірына Касцевіч.
Яна прапанавала тым, хто згубіў працу ісці на палявыя працы.
“Цяпер ідуць сезонныя палявыя працы, чалавек можа зарабіць дадатковую капейчыну”, — адзначыла міністр.
Касцевіч паведаміла, што сёлета ў студзені-сакавіку колькасць занятых у эканоміцы Беларусі склала прыкладна 4 мільёны 245 тысяч чалавек.
