Паліна Дабравольская распавяла пра культурнае жыццё ў эміграцыі
Беларускія дзеячы культуры ў Польшчы стараюцца выкарыстоўваць усе магчымыя нагоды ды пляцоўкі для таго, каб развіваць свае прадукты і падтрымоўваюць да іх інтарэс, у тым ліку з польскага боку.
Пра гэта распавяла акторка ды спявачка Паліна Дабравольская, якая жыве і працуе ўжо другі год у эміграцыі:
РР: Як у Вас выглядае культурнае жыццё ў эміграцыі на ліпень 2022 году?
– Першае, што хочацца адзначыць гэта тое – што ліпень для ўсіх нас атасамляецца з тыднем беларускай культуры, таму вельмі шмат мерапрыемстваў не толькі ў Польшчы, але і амаль ва ўсіх краінах свету, дзе толькі ёсць некалькі беларусаў. Таму гэты і мінулы месяцы былі дастаткова актыўныя ў культурным плане. Гэта тычыцца не толькі музыкі ці тэатру, але і выстаў. Напрыклад 17 ліпеня адкрыўся Музей Салідарнасці. Было ўрачыстае адкрыццё, і цяпер ён будзе працаваць. Таксама было 2 чыткі сучасных аўтараў драматургаў. Я таксама ў адной з іх прымаў удзел. Таксама 10 ліпеня быў фестываль. І гэта ўсё толькі ў Варшаве. Я ўжо не кажу, колькі было мерапрыемстваў ва ўсім сусвеце.
РР: Раней Вы планавалі такія беларуска-польскія праекты, ці яны атрымалі сваю рэалізацыю ці працяг?
– Насамрэч я дагэтуль працягваю працаваць над адным праектам, ён беларуска-польска-украінскім, у ім удзельнічаюць акторкі з гэтых краінаў. Хтосьці ў эміграцыі, хтосьці жыве тут. Гэта праца пра жанчын, пра пошук месца, дзе можна знаходзіцца, жыць у нейкім спакоі. Мы працягваем працаваць над гэтым спектаклем і спадзяемся, што ўжо ў верасні ў нас атрымаецца паказаць ужо нейкі першы кавалак гэтага спектаклю, і будзем глядзець як пойдзе, і далей працаваць. Што тычыцца іншых праектаў то канешне, усё больш і больш людзей тут у Польшчы, я кажу не толькі пра беларусаў. З’яўляецца ўсё больш і магчымасцяў і жаданняў штосьці рабіць, і ў той жа час стомленасці. Нейкага неразумення куды кінуцца. Але гэта ўсё нашыя ўлюбёныя жаночыя эмацыйныя арэлі, таму працуем як можам.
Цалкам размова:
Паліна Дабравольская дадала, што беларускія дзеячы культуры працуюць не толькі на беларускую, але ў цэлым на еўрапейскую аўдыторыю без падзелу на нацыянальнасці. Пры неабходнасці культурніцкія праекты перакладаюцца на мову зразумелую для гледача ці слухача.
Беларускае Радыё Рацыя
