Засакрэчаны пункт указа аб мабілізацыі дазваляе Мінабароны Расеі прыцягнуць мільён чалавек
211 дзень расейскага ўварвання ва Украіну. Засакрэчаны пункт указа аб мабілізацыі дазваляе расейскаму Міністэрству абароны прыцягнуць мільён чалавек. У сёмым пункце ўказа Пуціна аб мабілізацыі гаворыцца, што ў войска могуць быць прызваныя да мільёна чалавек, паведамляе «Новая газета. Еўропа” са спасылкай на крыніцу ў адміністрацыі расейскага прэзідэнта.
„Лічбу некалькі разоў выпраўлялі, і ў выніку спыніліся на мільёне”, — сказала крыніца. З моманту абвяшчэння мабілізацыі ваенныя камісары як мінімум чатырох расейскіх рэгіёнаў падпісалі загады, якія забараняюць ваеннаабавязаным грамадзянам пакідаць свае гарады.
Тым часам украінскі мэр акупаванага Мелітопаля заклікаў выязджаць з горада мужчын ва ўзросце 18-35 гадоў. Паводле Івана Фёдарава, расейцы могуць залучыць да сваёй мабілізацыі мужчын, што пражываюць на акупаваных тэрыторыях Украіны. Ужо сёння мужчын ва ўзросце ад 18 да 35 гадоў не выпусцілі з падкантрольнай расейцам тэрыторыі ў бок Запарожжа (якое кантралюецца ўкраінцамі).
Фёдараў мяркуе, што такіх выпадкаў будзе ўсё больш. Ён раіць маладым мужчынам выязджаць з Мелітопаля ў Грузію праз Крым.
Паводле ТГ “Баста” і „Белсат”
