У Кітаі за мінулы год насельніцтва скарацілася на 850 тысяч чалавек
У 2022 годзе яно паменшала на 850 тысяч чалавек у параўнанні з мінулым годам, вынікае са звестак даклада Дзяржаўнага статыстычнага ўпраўлення КНР, на які спасылаецца China News.
Да канца 2022 года насельніцтва Кітая склала 1 411 750 000 чалавек, да канца 2021-га гэта лічба была большая на 850 тысяч. За мінулы год у краіне нарадзіліся 9,56 млн дзяцей і памерлі 10,41 млн жыхароў.
Апошні раз такое скарачэнне колькасці насельніцтва было зафіксавана ў Кітаі ў 1961 годзе ў перыяд вялікага кітайскага голаду. Эксперты ААН прагназуюць, што да 2050 года насельніцтва Кітая скароціцца на 109 млн чалавек, што больш чым у тры разы перавышае іх папярэдні прагноз у 2019 годзе, адзначае Reuters.
Агенцтва піша, што такі дэмаграфічны спад стаў вынікам палітыкі Кітая «адна сям’я — адно дзіця», уведзенай у перыяд з 1980 па 2015 год, а таксама высокіх коштаў на адукацыю, праз якія сем’і часта адмаўляюцца выхоўваць больш за адно дзіця.
Жанчын у рэпрадуктыўным узросце (улады Кітая вызначаюць, што ў гэтую катэгорыю ўваходзяць жанчыны 25—35 гадоў) за мінулы год стала менш на 4 млн.
Адначасова з’яўляецца інфармацыя аб дэмаграфічнай сітуацыі ў іншай густанаселенай краіне свету – Індыі. Гэтая краіна можа ў бліжэйшыя 20 гадоў апярэдзіць Кітай па колькасці насельніцтва, пры гэтым праблемы старэння насельніцтва ў Індыі не назіраецца і лік працаздольных людзей у ёй пастаянна расце.
