На акцыю з нагоды „завочных судоў” запрашаюць у Беластоку
22 студзеня а 13:00 арганізатары акцыяў маржавання ў Беластоку запрашаюць усіх ахвотных на гарадскі пляж „Дайліды” на акцыю з нагоды „завочных судоў” ды іншых фарсаў пад выглядам судоў, якія апошнім часам набываюць папулярнасць у карнікаў Беларусі.
Нагадаем, 9 студзеня пачаўся суд над супрацоўнікамі “ТУТ БАЙ МЕДЫЯ”: гендырэктарам кампаніі Людмілай Чэкінай, галоўным рэдактарам TUT.BY Марынай Золатавай, журналісткамі Вольгай Лойка і Аленай Талкачовай і Кацярынай Ткачэнка, якая працавала юрысткай;
17 студзеня пачаўся завочны „суд” над Святланай Ціханоўскай, Паўлам Латушкам, Вольгай Кавальковай, Марыяй Мароз, Сяргеем Дылеўскім.
18 студзеныя грамадства даведалася пра вынік наступнага „завочнага суда”: 12 гадоў калоніі прысудзілі пяці фігурантам справы «Чорнай кнігі Беларусі» падчас «завочнага працэсу». Судзілі Яніну Сазановіч, Дзмітрыя Навошу, Данііла Багдановіча, Валерыю Занямонскую і Вольгу Высоцкую.
Падчас імпрэзы арганізатары абяцаюць, што адбудзецца традыцыйнае маржаванне, гарбата і размовы.
Беларускае Радыё Рацыя
