На Піншчыне ўшанавалі памяць Рамана Скірмунта
На Піншчыне ўшанавалі памяць прэм’ер-міністра БНР, дэпутата польскага ды расейскага парламента Рамана Скірмунта (1868-1939).
З нагоды 147-годдзя чальцы інфармацыйна-асветніцкай установы „Істытуцыйнага развіцця” ўсклалі кветкі і запалілі знічы на магіле Скірмунта, а таксама здзейснілі вандроўку па былым уладанням палітыка.
Раман Скірмунт пахаваны ў Парэччы ў парку, які заклаў у пачатку мінулага стагоддзя, адзначыў гісторык-краязнаўца Эдвард Злобін:
– На ўскрайку парэцкага парку месціцца пахаванне Рамана Скірмунта – вядомага грамадскага, палітычнага дзеяча Палесся, Беларусі, Расеі, Польшчы, чалавека сусветнай значнасці. У гэтым месцы пахаваны не толькі Раман. Ушанавалі памяць яго пляменніка Аляксандра, яго сястры Хелены, яе мужа Баляслава, а таксама 8 польскіх жаўнераў, якія загінулі ў 1919 годзе.
Для пінскай грамадскасці і аматараў мінуўшчыны магіла Скірмунта з’яўляецца сакральным месцам, кажа актывіст Ігар Салавей:
– Штогод у гэты дзень пінская грамадскасць прыязджае на гэтае месца, каб ушанаваць памяць Рамана Скірмунта. Да гэтага месца ўжо ладзяцца своеасаблівыя паломніцтвы – гэта традыцыя існуе з 1990-х гадоў.
Акрамя Парэчча чальцы арганізацыі наведалі Моладава, дзе знаходзяцца радавыя могілкі Скірмунтаў. Падчас мерапрыемстваў абмяркоўваліся пытанні, што магчыма зрабіць, каб палепшыць стан парэцкага парку ды моладаўскіх пахаванняў.
[Not a valid template]
Пятро Савіч, Беларускае Радыё Рацыя
Фота аўтара
