Батумі: лісты для палітзняволеных вельмі патрэбныя
У грузінскім Батумі адбываецца акцыя па напісанні лістоў да палітзняволеных, што сядзяць у беларускіх турмах і калоніях. У дзвюх кропках горада, а гэта крама нацыянальнай сімволікі і „МедыяХаб”, цягам дня любы жадаючы можа напісаць ліст беларускаму палітзняволенаму.
Пра акцыю і яе важнасць кажуць удзельнікі:
– Канешне, важна ў тым плане, што калі прасядзець у закрытым пакоі некаторы час і не ведаць ніякіх навінаў, нічога, то там невялікая гісторыя з волі, проста чыісьці ўражанні, нават незнаёмага чалавека, могуць быць падтрымкай. І нават сам факт, што табе хтосьці піша – гэта значыць цябе памятаюць, цябе цэняць.
– І што ўсё ж такі ёсць нейкая надзея, што яшчэ не ўсё згублена, што сітуацыя можа змяніцца ў лепшы бок.
– Перш за ўсё таму, што людзі павінны разумець, што яны ахвяравалі хто сваім здароўем, хто сям’ёй, а хто нават жыццём.
Пад час акцыі ўжо напісана некалькі дзясяткаў лістоў, таксама людзі бяруць дахаты паперу, канверты і паштоўкі, каб разам у коле сям’і напісаць лісты сваім знаёмым, што знаходзяцца за кратамі ў Беларусі.
Беларускае Радыё Рацыя
