Агляд прэсы: больш абміцыйнасці
Расея і Беларусь падпісалі дакумент аб размяшчэнні ў Беларусі тактычнай ядзернай зброі. Уварванне на тэрыторыю РФ: што адбываецца ў Белгарадзе? Юбілей: 160 гадоў Сацыял-дэмакратычнай партыі Германіі. Рон Дэсантыс: праблемны старт прэзідэнцкай кампаніі. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
Разам з большасцю СМІ свету індыйская газета The Mint паведаміла пра тое, што Расея і Беларусь падпісалі ў чацвер дакумент аб размяшчэнні ў Беларусі расейскай тактычнай ядзернай зброі з расейскім жа кіраваннем. Асобна расійскія СМІ паведамілі, што міністр абароны РФ Сяргей Шайгу заявіў, што Захад вядзе «неаб’яўленую вайну» супраць Расеі і Беларусі.
«Масква захавае кантроль над зброяй і любымі рашэннямі аб яе выкарыстанні. Расея і Беларусь, якія з’яўляюцца блізкімі саюзнікамі па канфлікце ва Украіне, у пачатку гэтага года дамовіліся аб размяшчэнні ў Беларусі часткі тактычнага ядзернага арсенала Масквы. Беларусь займае ключавое месца для Расеі, паколькі яна не мае выхаду да мора і мяжуе з Расеяй на ўсходзе і паўночным усходзе, Украінай на поўдні, Польшчай на захадзе і Літвой і Латвіяй на паўночным захадзе. У той час як суседнія з Беларуссю краіны ўваходзяць у групу НАТА і ЕЗ, яна заставалася пад моцным уплывам Расеі. Беларусь была часткай Савецкага Саюза і стала незалежнай у 1991 годзе пасля распаду СССР. З таго часу краіна з насельніцтвам каля 9,2 мільёна чалавек падтрымлівае цесныя эканамічныя і палітычныя сувязі з Расеяй. Беларускі рэжым на чале з Лукашэнкам падтрымаў уварванне ва Украіну. Беларусь дапамагла Расеі пачаць першапачатковае ўварванне ва Украіну ў лютым мінулага года, дазволіўшы войскам Крамля ўвайсці ў краіну праз 1000-кіламетровую (621-мільную) украінска-беларускую мяжу на поўнач ад Кіева», – піша індыйскае выданне.
Раніцай у панядзелак узброеныя атрады зайшлі з тэрыторыі Украіны на тэрыторыю РФ, у Белгарадскую вобласць, і там замацаваліся. Атрады інтэрвентаў складаюцца з баявых атрадаў расейцаў, апазіцыйна настроеных у адносінах да рэжыму. У сераду губернатар Белгарадскай вобласці заявіў аб новым нападзе дронамі. Аглядальнікі спрабуюць разабрацца ў тым, што ж насамрэч адбываецца. Расейскія каналы распаўсюджваюць фатаграфіі нібы кінутай у Белгарадскай вобласці ваеннай тэхнікі, сярод якой і амерыканскія шматмэтавыя бранявікі Humvee. Чэшская газета Lidové noviny у гэтай сувязі піша:
«Гэта магло аказацца супадзеннем. Гэта значыць, украінцы аснасцілі гэтай тэхнікай расійскіх добраахвотнікаў, паколькі яна была ў іх у распараджэнні і яны асабліва не разважалі. Ці гэта не было супадзеннем, і яны, наадварот, хацелі паказаць, што не будуць сябе абмяжоўваць у выкарыстанні заходняй тэхнікі. У любым выпадку, гэта – праблема для Вашынгтона, і яна выклікае незадаволенасць тамтэйшых палітыкаў. Амерыканцы ўжо неаднаразова казалі аб тым, што не дазваляюць украінцам перадаваць гэтую тэхніку ваенізаваным фармаванням або выкарыстоўваць яе для нападу на тэрыторыю Расеі».
Сацыял-дэмакратычная партыя Германіі – найстарэйшая палітычная партыя краіны адзначае 160-гадовы юбілей. У ходзе свайго выступлення на святочнай цырымоніі з нагоды гадавіны федэральны канцлер і член СДПГ Олаф Шольц заявіў, што мае намер прыкласці ўсе намаганні да таго, каб у грамадстве ўзяў верх прынцып узаемнай павагі, і таксама падкрэсліў, што адной з найважнейшых задач, якія стаяць цяпер перад краінай, з’яўляецца перабудова эканомікі ў адпаведнасці з прынцыпамі аховы клімату. Аглядальнікі разважаюць пра тое, чаму СДПГ, гэтая «гранд-дама» германскай палітыкі, усё больш губляе сваю прывабнасць у вачах выбаршчыкаў. «СДПГ паступова ператварылася ва маркотную і сумную партыю», – дзеліцца сваімі назіраннямі нямецкая газета Der Tagesspiegel.
«Куды ж падзелася былое ўтапічнае багацце? Дзе гэтак упадабаны народу палёт думкі ў паветраны свет летуценняў? На фоне таго, што ўрад узначальвае канцлер ад СДПГ, які нагадвае хутчэй натарыуса, чым палітычнага лідэра, характар СДПГ як праграмнай партыі блякне і цьмянее. Партыі цяпер як ніколі патрэбныя канцэпцыі, з якімі яна магла б усяліць у людзей веру ў заўтрашні дзень, натхніць іх – і здабыць у іх вачах прывабнасць. І для гэтага партыя суцэль мае права весці спрэчкі з нагоды занадта ўжо «заліхвацкіх» уяўленняў і, так, вылучаць больш амбіцыйныя бачанні будучыні. Прагматызм і крэсла федэральнага канцлера – для ХДС гэтага было б, можа, і дастаткова, але для СДПГ гэтага адназначна занадта мала», – падкрэслівае нямецкае выданне.
Губернатар Фларыды Рон Дэсанціс афіцыйна ўступіў у барацьбу за прэзідэнцкае крэсла і заявіў аб намеры балатавацца на пасаду прэзідэнта ад Рэспубліканскай партыі. Аб’ява аб вылучэнні планавалася зрабіць у сетцы Twitter разам з яе генеральным дырэктарам Ілонам Маском, але ў выніку справа зацягнулася з-за шэрагу тэхнічных праблем. «Дэсантысу будзе вельмі няпроста абараніць свае пазіцыі, канкуруючы з Трампам», – адзначае брытанскі штотыднёвік The Economist.
«Яго крытыкавалі за ізаляцыянісцкую пазіцыю, паколькі ён казаў аб вайне ва Украіне ўсяго толькі як аб «тэрытарыяльным канфлікце», яму ставіўся недавер да бізнэсу, паколькі ён задумаў спрэчкі з кампаніяй Disney, яго вінавацілі ў экстрэмізме за падпісанне забароны на аборт на тэрміне цяжарнасці звыш шасці тыдняў. У 2016 годзе Трамп ішоў на выбары ў ролі гэтакага пазасістэмнага бунтаўшчыка, у 2020 – вылучаўся як дзейны прэзідэнт, а ў 2024 ён аб’яднае ў сабе абедзве выявы, прадставіўшы адначасова і мяцежнікам, і інстытуцыяналістам. Гэта – вельмі дзейсная камбінацыя, якая ўжо дазволіла яму вырвацца далёка наперад у першых апытаннях грамадскай думкі», – канстатуе брытанскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
