1. РАЦЫЯ
2. Спорт
3. Беларусы заваявалі яшчэ два медалі Гран-пры па цяжкай атлетыцы

Беларусы заваявалі яшчэ два медалі Гран-пры па цяжкай атлетыцы

Беларускія цяжкаатлеты працягваюць браць узнагароды на Гран-пры ў Гаване, які з’яўляецца адным з кваліфікацыйных турніраў да Алімпіяды-2024.

Пётр Асаёнак у вагавай катэгорыі 89 кг заваяваў залаты медаль, набраўшы ў суме двубор’я 368 кг (162+206). У вагавай катэгорыі 71 кг у жанчын беларуска Сюзана Валадзько стала ўладальніцай срэбра з вынікам 242 кг (108+134).

Жаночая зборная Беларусі зноў была разгромлена камандай Расіі

Жаночая зборная Беларусі па баскетболе пацярпела буйную паразу ад каманды Расіі ў заключным матчы на Кубку Заклад-2023 — 51:91.

Самым выніковым гульцом у складзе беларускай каманды стала Арына Масько, якая набрала 13 ачкоў. Ніхто з яе сябровак па камандзе не зарабіў больш за дзевяць балаў. У складзе расіянак 14 балаў у актыве Дар’і Ігнатавай. Такім чынам, каманда Наталлі Трафімавай пацярпела тры паразы ў трох матчах ад зборнай Расіі і расійскай „маладзёжкі”.

Лютыч пакіне „Ніжні Ноўгарад”

Беларускі форвард Віталь Лютыч не згуляе за „Ніжні Ноўгарад” у новым сезоне, паведамляе тэлеграм-канал „Перахоп”.

Бакі прынялі ўзаемнае рашэнне не актываваць опцыю кантракта на наступны год. У мінулым сезоне Адзінай лігі ВТБ Лютыч правёў 20 матчаў, у якіх у сярэднім набіраў 2 ачкі, рабіў 1 падбор, 0,5 перахопа, 0,3 паса і 0,1 блока. Раней 31-гадовы баскетбаліст выступаў за „Шаўлі”, „Цмокi-Мінск”, „Калеў”, „Енісей” і „Самару”.

Футбалісты маладзёжнай зборнай Беларусі правядуць спарынг з расіянамі ў Барысаве

Футбалісты маладзёжнай зборнай Беларусі (U-21) праводзяць сёння кантрольны матч супраць аднагодкаў з Расіі. Паядынак на гарадскім стадыёне ў Барысаве пачаўся ў 17.00. Для беларускай каманды сустрэча стане апошняй праверкай перад гасцявым адборавым матчам са зборнай Андоры, які адбудзецца 20 чэрвеня.

Гол Стасевіча прызнаны ў Казахстане лепшым у траўні

Прафесійная футбольная ліга Казахстана правяла адкрытае галасаванне сярод заўзятараў для вызначэння лепшага гола траўня.

На выбар аматараў футбола было прапанавана 9 галоў, забітых у рамках матчаў чэмпіянату і Кубка.

Па выніках галасавання лепшым голам траўня быў прызнаны гол беларускага паўабаронцы „Атырау” Ігара Стасевіча, забіты ў браму „Жэтысу” ў 10 туры чэмпіянату. За гэты гол з далёкай адлегласці ў верхні кут свае галасы аддалі 27% рэспандэнтаў.

Карпіцкі трапіў у сферу інтарэсаў „Ахмата”

Беларускі форвард „Шахцёра” Ягор Карпіцкі трапіў у сферу інтарэсаў „Ахмата”. 19-гадовы нападнік знаёмы з настаўнікам грозненцаў Сяргеем Ташуевым, які працаваў у „Шахцёры”. Карпіцкі – лідар гонкі бамбардзіраў чэмпіянату Беларусі-2023. У яго актыве 12 мячоў у 11 матчах.

Грэцкі працягнуў кантракт з „Амурам”

Беларускі форвард Вячаслаў Грэцкі працягнуў кантракт з хакейным клубам „Амур”. Новае двухбаковае пагадненне разлічана на адзін год, паведамляе „ХакейРу”. Мінулы сезон для форварда стаў другім у КХЛ. У 43 матчах „рэгуляркі” Грэцкі набраў 5 (3+2) ачкоў пры паказчыку карыснасці „-11” і 42 хвілінах штрафу. 26-гадовы Вячаслаў стаў лідарам па колькасці сілавых прыёмаў сярод нападнікаў клуба.

Беларускае Радыё Рацыя