Зборная Малдовы абыграла Польшчу ў кваліфікацыі Еўра-2024
Зборная каманда Малдовы сенсацыйна абыграла каманду Польшчы ў 4-м туры кваліфікацыі чэмпіянату Еўропы па футболе 2024 года. Падначаленыя Сяргея Клешчанкі здзейснілі надзвычайны камбэк у хатнім матчы. Паядынак, які адбыўся ў Кішынёве на стадыёне „Зімбру”, завяршыўся валявой перамогай зборнай Малдовы з лікам 3:2. Лік у матчы на 12-й хвіліне адкрыў нападнік зборнай Польшчы Аркадыўш Мілік. Праз 24 хвіліны Роберт Левандоўскі падвойвае перавагу гасцей. На старце другой паловы паядынку форвард Іён Нікалаеску «распячатаў» браму галкіпера польскай зборнай Войцэха Шчэнснага, адзначыўшыся голам на 48-й хвіліне, а ўжо на 79-й хвіліне Мікалаеску зноў засмуці гасцей, аформіўшы дубль і зраўняўшы лічбы на табло. Кропку ў супрацьстаянні паставіў абаронца гаспадароў Уладзіслаў Бабагло, які ўсталяваў канчатковы лік у матчы на 85-й хвіліне. Такім чынам, футбалісты зборнай Малдовы святкавалі першую перамогу ў кваліфікацыйным раундзе. Зборная Польшчы пацярпела другую паразу ў трох згуляных турах і з 3 ачкамі на балансе размяшчаецца на чацвёртым радку групы. У іншых матчах зборная Казахстана абыграла Паўночную Ірландыю 1:0. Зборная Нарвегіі святкавала перамогу над камандай Кіпра 3:1 – зорны форвард Эрлінг Холанд адзнычыўся дублем. Бельгія разграміла зборную Эстоніі 3:0 – два мячы забіў нападнік Рамэлу Лукаку. Раналду забіў 123-і мяч за Партугалію. Гэты гол стаў пераможным у гульні з Ісландыяй 1:0. 38-гадовы футбаліст правёў 200-ы матч за зборную, што з’яўляецца сусветным рэкордам.
Беларусы згулялі ўнічыю з андорцамі ў кваліфікацыі моладзевага ЧЕ
Футбалісты маладзёжнай зборнай Беларусі (U-21) трэці раз запар згулялі ўнічыю ў адборавым турніры чэмпіянату Еўропы 2025 года. У сваім трэцім матчы кваліфікацыйнай групы G каманда Сяргея Ясінскага не змагла выйграць у гасцях у аднагодкаў з Андоры – 1:1. У першым тайме забітых мячоў не было, а неўзабаве пасля перапынку Берта Росас вывеў гаспадароў наперад. Прапусціўшы мяч, беларусы актывізаваліся і на 64-й хвіліне Кірыл Зіновіч з пенальці аднавіў парытэт, але большага нашы гульцы дамагчыся не здолелі. Свой наступны паядынак беларуская „маладзёжка” правядзе ў пачатку верасня супраць каманды Фарэрскіх выспаў.
Пасля паразы ад «Слуцка» гульцам БАТЭ абвясцілі пра істотнае зніжэнне заробкаў
Як паведамляюць крыніцы «Трыбуны», у БАТЭ маюцца запазычанасці перад футбалістамі, і яны датычацца заробкаў – гульцы не бачылі грошай па кантракце ўжо пару месяцаў. Некаторыя з іх з гэтай нагоды ўжо наўпрост звярталіся да Андрэя Капскага, каб высветліць, як і калі сітуацыя вырашыцца. Кіраўнік ад канкрэтных абяцанняў устрымаўся. Ну а пасля паразы ад «Слуцка» з лікам 0:1 4 чэрвеня калектыву было абвешчана пра значнае скарачэнне заробкаў – тыя ўпалі ў разы. Па звестках крыніц «Трыбуны», дайшло да таго, што тыя футбалісты, якія атрымлівалі восем тысяч рублёў, будуць гуляць за паўтары-дзве тысячы. Зроблена гэта і ў якасці пакарання, і ў мэтах эканоміі. Ці часовая гэтая мера, «Трыбуне» гэта высветліць не ўдалося.
Арына Сабаленка выйшла ў 1/8 фіналу турніру ў Берліне
Беларускія тэнісісткі праводзяць стартавыя паядынкі турніру WTA-500 у Берліне з прызавым фондам 780 тысяч даляраў. Першай з трох прадстаўніц Беларусі на корт выйшла Арына Сабаленка, якая ў першым раундзе абыграла расейскую тэнісістку Веру Званарову – 6:3, 6:2. У матчы за трапленне ў чвэрцьфінал суперніцай Сабаленкі будзе пераможца матчу паміж яшчэ адной расейкай Веранікай Кудэрметавай і кітаянкай Сінвэнь Чжэн. Таксама ў нямецкай сталіцы пачалося беларускае дэрбі: Вікторыя Азаранка ў 1/16 фіналу сустракалася з Аляксандрай Сасновіч. Пасля абмену брэйкамі на старце матчу беларускі імкнуліся трымаць падачу. У сёмым гейме Сасновіч зноў авалодала прыёмам і давяла адрэзак да перамогі. Але пры ліку 1:1 у другой партыі гульня была перапынена з прычыны змяркання. Нядзіўна, бо тэнісісткі павінны былі выйсці на корт у раёне 16:00. Але перашкодзіў дождж, і толькі ў 20.45 усё пачалося. Дагуляць матч плануецца сёння.
Беларускае Радыё Рацыя
