Ці прыляцеў Яўгеній Прыгожын у Беларусь?
Пра тое, ці прыехаў у Беларусь кіраўнік ПВК «Вагнэр», спрабавалі даведацца па розных каналах. Але пакуль што дакладнай інфармацыі пра яго прыбыццё няма, усё абмяжоўваецца чуткамі. Расейскае выданне «Фонтанка» 26 чэрвеня патэлефанавала ў прэс-службу Лукашэнкі, але там не змаглі адказаць, ці прыбыў ужо Яўгеній Прыгожын у Беларусь. Супрацоўнік прэс-службы заявіў, што «няма такой інфармацыі», і прапанаваў адправіць запыт.
Расейскі тэлеграм-канал Brief паведаміў сёння днём, што Прыгожына нібыта бачылі ў менскім гатэлі Green City на Каменнай Горцы. Аднак пацвярджэнняў гэтай інфармацыі няма. Маніторынгавая група «Беларускі Гаюн» пры гэтым сцвярджае, што абодва самалёты Прыгожына – у Расеі. Такім чынам, як мінімум на сваіх самалётах Прыгожын у Беларусь не прылятаў.
