Сярэдні заробак у траўні вырас
Намінальны налічаны сярэдні заробак у траўні склаў 1861,1 рубля, як паведаміў Белстат. Для параўнання: у красавіку быў 1795,9 рубля, а ў сакавіку — 1814,2 рубля.
Але гэта заробак «бруднымі». Калі ўзяць пасля вылічэння падаткаў, то сярэдні заробак чыстымі складзе 1600,5 рубля, або 532 даляры па стане на сёння.
Калі параўноўваць рэгіянальныя паказчыкі, то ў лідарах Мінская вобласць — 1886,4 рубля, а на апошняй пазіцыі — Магілёўская (1546,7 рубля). Мінск па-за канкурэнцыяй — 2500 рублёў.
У цэлым па краіне самая высокааплатная галіна — інфармацыя і сувязь, куды ўваходзіць IT-сфера. Тут сярэдні заробак у траўні склаў 5034,7 рубля.
Сярод найменшых заробкаў — дзейнасць у сферы адміністрацыйных і дапаможных паслуг (1294,8 рубля). У адукацыі сярэдні заробак склаў 1324,6 рубля, а ў ахове здароўя і сацыяльных паслугах — 1547,7, як піша «Наша Ніва».
