Cусветная прэса пра Беларусь: Хто «у доме гаспадар»?
Матэрыялізацыя страхаў Лукашэнкі. ЕЗ стварае новую Кансультацыйную групу па Беларусі з дэмакратычных сіл і грамадзянскай супольнасці. Няправільныя рашэнні Пуціна маюць доўгатэрміновыя наступствы і для Беларусі.
Ужо некалькі месяцаў Мінск усімі сваімі дзеяннямі паказвае, што зараз там па-новаму бачаць вонкавыя пагрозы. «Баявікі апазіцыі», «украінскія дыверсанты», «уварванне НАТА» ператварыліся з прапагандысцкіх страшылак у рэальныя страхі ўлады, якія сталі вызначаць і ўнутраную, і знешнюю палітыку Беларусі», – піша амерыканскі штотыднёвік Carnegieendowment.
«Рэальнасць гэтых страхаў не ў тым, што нехта сапраўды рыхтуецца вось-вось перайсці беларускую мяжу са зброяй у руках, а ў тым, што Аляксандр Лукашэнка перастаў сумнявацца, што менавіта такія планы яго ворагаў. Як бачна, Менск прыняў больш мераў засьцярогі і ўзмацніў кантроль мацней, чым непасрэдна ваюючая Масква, якой ужо даводзіцца эвакуіраваць цэлыя гарады з-за няздольнасьці надзейна закрыць мяжу. Лукашэнка баіцца, што пры зручным выпадку і пад шумок вайны яго могуць зрынуць, як Хусэйна ці Кадафі, і што менавіта да гэтага рыхтуюцца Украіна, Польшча, ды і ўвогуле Захад. Вайна сапраўды радыкалізавала беларускую эміграцыю. Сотні беларусаў пайшлі на фронт абараняць Украіну. Структуры апазіцыі, якія знаходзяцца ў Польшчы, уключаючы BYPOL і парамілітарную групу «Паспалітае рушэнне», праводзяць спецпадрыхтоўку сваіх актывістаў па ваенных дысцыплінах. Ціханоўская ўжо адкрыта дапускае, што аднойчы папросіць Зяленскага дапамагчы ў вызваленні Беларусі. Дапамагчы відавочна не санкцыямі. Пазіцыя Кіева тут выразная: пакуль Лукашэнка не ўвязаўся ў вайну сваёй арміяй, Украіна імкнецца не даваць яму новых падстаў гэта зрабіць. Для Польшчы, краін Балтыі і тым больш для ЗША ідэя ваеннага ўварвання нават у такую хуліганскую дыктатуру, якой у апошнія гады стала Беларусь, выглядае зусім неймаверна, таму што практычна непазбежна будзе азначаць прамое ваеннае сутыкненне з Расіяй, якога Захад старанна пазбягае. Аднак напалохаючы сябе выдуманымі пагрозамі вызваленчага паходу эмігранцкіх атрадаў, Лукашэнка сваімі рукамі падвышае рызыкі таго, што вайна рэальна прыйдзе да яго ў краіну, але з куды большым размахам і не прайшоўшы памежны кантроль», – папярэджвае амерыканскае выданне.
Вярхоўны прадстаўнік ЕЗ Жазэп Барэль у Брусэлі адкрыў новую Кансультацыйную групу паміж Еўрасаюзам і беларускімі дэмакратычнымі сіламі і грамадзянскай супольнасцю ў прысутнасці Святланы Ціханоўскай і іншых вядомых дзеячаў беларускай апазіцыі і грамадзянскай супольнасці.
Як паведамляе еўрапейскі штотыднёвік Euneighbourseast, выступаючы ў якасці пляцоўкі для дыялогу паміж ЕЗ і прадстаўнікамі грамадзянскай супольнасці Беларусі, Кансультатыўная група будзе забяспечваць абмен інфармацыяй аб сітуацыі ў краіне, а таксама будзе дапамагаць фармаваць далейшыя дзеянні ЕЗ у падтрымку свабоднай, суверэннай і дэмакратычнай Беларусі.
«Прадстаўнікі ЕЗ і Беларусі абмеркавалі пагаршэнне сітуацыі з правамі чалавека ў краіне, у тым ліку ўмовы ўтрымання палітвязняў і іх сем’яў, а таксама мэты і патрэбы дэмакратычных сіл. Удзельнікі асудзілі саўдзел Беларусі ў агрэсіўнай вайне Расеі супраць Украіны, у тым ліку ўзмацненне ядзернай рыторыкі рэжыму. ЕЗ заяўляе, што па-ранейшаму гатовы актываваць комплексны план у 3 мільярды еўра ў падтрымку дэмакратычнай Беларусі, як толькі Беларусь стане на шлях дэмакратычных пераходаў», – падкрэслівае еўрапейскае выданне.
Войны выяўляюць уразлівасць нацыі спосабамі, якія часта ўражваюць, а таксама здзіўляюць. Нягледзячы на тое, што мяцеж Прыгожына быў спынены за 24 гадзіны, шок ад таго, што адбылося, працягвае адбівацца ў калідорах улады ў Крамлі і далёка за яго межамі.«Калі справа дайшла да вырашэння крызісу, Лукашэнка заключыў пакт. Прыгожын знаходзіцца ў Беларусі ў рамках гэтай здзелкі, якая дала яму гарантыі бяспекі, а таксама спыненне крымінальнай справы супраць яго, а яго байцоў папрасілі залічыць у расейскае войска або адправіцца ў Беларусь. Гэта вельмі знервавала рэгіянальныя дзяржавы, такія як Польшча, Латвія і Літва», – піша еўрапейскае выданне Eurasiareview.
„ Той факт, што Прыгожын бяспечна ўладкаваўся ў Беларусі, сведчыць пра тое, якія рычагі ўплыву ён мае на адносіны з Пуціным. Пры ўсёй сваёй пагардзе да здрады, Пуцін вымушаны цярпець Прыгожына нават пасля таго, як яго непасрэдна зняважылі, прынамсі, пакуль. Але гэта азначае, што Пуціну цяпер спатрэбіцца нешта іншае, каб аднавіць свой згасаючы аўтарытэт. Найбольш верагодным зыходам з’яўляецца эскалацыя ў дачыненні да Украіны. Ракетныя ўдары па розных украінскіх гарадах ужо пачаліся, па паведамленнях, Расея нанесла некалькі ўдараў па грамадзянскіх аб’ектах па ўсёй Украіне. Расія дае зразумець, што, нягледзячы на ўнутраныя турбулентнасці, вайна супраць Украіны будзе працягвацца з усёй лютасцю, якой яна валодае. Расейскія вайскоўцы паспрабуюць стварыць пачуццё нармальнасці, перайшоўшы ў наступ», – папярэджвае еўрапейскае выданне.
Агляд сусветнай прэсы пра Беларусь падрыхтавала Вольга Сямашка
