Валер Карбалевіч: Гэта яго палітычная лінія, якую ён настойліва праводзіць
Віншаванне, якое абурыла і выклікала дадатковую палітычную дыскусію. У Дзень незалежнасці Украіны Аляксандр Лукашэнка выслаў віншаванне, але да ўкраінскага народу. Такую практыку выкарыстоўваюць зараз улады Расеі і Беларусі, калі не хочуць непасрэдна звяртацца да палітыкаў краін, якія яны называюць недружалюбнымі. У Вярхоўнай радзе віншаванне назвалі цынічнымі.
Спецыфіку апошніх заяваў Аляксандра Лукашэнкі па Украіне ацаніў палітычны аналітык Валер Карбалевіч.
– Цяпер ён дасылае віншаванні на адрас не кіраўнікоў дзяржаваў, або ўрадаў краін, якія называюць недружалюбнымі, а на адрас народаў. І гэта новая такая тактыка, але хутчэй такая бюракратычная. На такое віншаванне амаль ніхто не звяртае ўвагу, скажам, у Еўразвязе. А вось ва Украіне ў парламенце на гэта звярнулі ўвагу і адрэагавалі адмоўна.
Лукашэнка Украіне прапануе зноў мірныя перамовы ды крытыкуе Уладзіміра Зяленскага, гэта рыторыка таксама ўкладаецца ў палітыку, што вядзе Аляксандр Лукашэнка, працягвае палітолаг Валер Карбалевіч.
– Гэта яго палітычная лінія, якую ён настойліва праводзіць у апошнім інтэрв’ю. Панчанкі ён пра гэта казаў. Цяпер зноў кажа. Гэта той прапагандысцкі наратыў, які праводзіць і расейская, і беларуская прапаганда. І Лукашэнка ў сваім віншаванні проста пераказаў гэты наратыў, не вельмі зважаючы на тое, як гэта будзе ўспрынята ў суседзяў. Хутчэй гэта арыентавана на беларускую і расейскую аўдыторыю. Але ён упарта працягвае гэтую лінію.
Цынічнымі заявы Аляксандра Лукашэнкі ўчора, 24 жніўня, назваў кіраўнік Камітэту Вярхоўнай рады Украіны па знешняй палітыцы і міжпарламенцкім супрацоўніцтве Аляксандр Меражка, іншы дэпутат, сябра гэтага камітэту ды лідар групы „За дэмакратычную Беларусь” Аляксей Ганчарэнка ў нашым эфіры сказаў, што Украіну не цікавяць віншаванні Лукашэнкі, паколькі ён страціў вагу незалежнага палітыка.
Беларускае Радыё Рацыя
