Суд ЕС адмовіўся здымаць санкцыі з кампаніі Synesis і яе ўладальніка
Суд Еўразвязу адхіліў пазоў IT-кампаніі Synesis і яе ўладальніка Аляксандра Шатрова, якія дамагаліся зняцця санкцый, перадае DW.
Synesis трапіла пад санкцыі ЕС у снежні 2020 года. Кампанію пакаралі за тое, што яна дапамагала ўладам вылічваць беларускіх пратэстоўцаў. У Афіцыйным часопісе ЕС гаворыцца: „Synesis прадаставіла беларускім уладам платформу відэаназірання Kipod, якая дазваляе ажыццяўляць пошук і аналіз відэазапісаў, а таксама выкарыстоўваць праграмнае забеспячэнне для распазнавання асоб, што робіць кампанію адказнай за рэпрэсіі грамадзянскай супольнасці і дэмакратычнай апазіцыі з боку дзяржаўнага апарату Беларусі”.
Раней кампанія Synesis спрабавала зняць санкцыі праз брытанскі суд, але таксама безвынікова. Сёлета выявілася, што беларускую сістэму Kipod ужывалі таксама ў Маскве для выяўлення і пераследу пратэстоўцаў.
У Ганцавічах будуюць фармацэўтычны завод
Пра стварэнне новай біяфармацэўтычнай вытворчасці лекаў у Ганцавічах паведаміла прэс-служба Мінздароўя. Будоўлю наведаў міністр аховы здароўя Дзмітрый Піневіч.
Па яго словах, будоўля ўключаная ў комплексны план “Праекта будучыні” — “Інавацыйная ахова здароўя”. Праект, як паведамляе Мінздароўя, рэалізоўваецца сумесна з партнёрамі з КНР. Спецыялісты, якія працуюць тут, паедуць на навучанне на аналагічную вытворчасць у кітайскі горад Шэньчжэнь. Па выніках візіту Піневіч даў даручэнне — паскорыць увод у эксплуатацыю гэтага завода.
Банк БелВЭБ прыдумаў, як змагацца з тэлефоннымі махлярамі
Банк БелВЭБ увёў новыя правілы выдачы крэдытаў, паведамляе яго прэс-служба. Цяпер пры афармленні крэдытаў банк будзе прадастаўляць грошы з сутачнай адтэрміноўкай: „Пры афармленні крэдыту грашовыя сродкі будуць даступныя кліентам на наступны працоўны дзень пасля заключэння крэдытнага дагавора (але не раней чым праз 24 гадзіны)”. Цягам гэтых сутак кліент зможа звярнуцца ў аддзяленне банка або ў кантакт-цэнтр па тэлефоне і адмовіцца ад крэдыту.
Як паведамляе “Еўрарадыё”, на такі крок банк пайшоў, каб засцерагчы кліентаў ад тэлефонных махляроў, якія ўгаворваюць аформіць крэдыт на трэціх асоб.
Беларуская фірма вазіла ў Расію дацкі ласось, але Данія пра гэта не ведала
Рассельгаснагляд абвінаваціў беларускую кампанію “РытМарк” у выкарыстанні падробленых ветэрынарных сертыфікатаў на рыбу і часова абмежаваў увоз прадукцыі кампаніі ў РФ. Падрабязнасці расказалі ў прэс-службе расійскага нагляднага ведамства, піша “Люстэрка”.
“РытМарк” пастаўляла ў Расію рыбапрадукцыю ласасёвых парод. Як сцвярджалі ў кампаніі, сыравіна паступала ў Беларусь з Даніі. Пры гэтым дацкае кампетэнтнае ведамства сапраўднасць выдадзеных беларускай кампаніі ветэрынарных сертыфікатаў не пацвердзіла.
“Усяго з чэрвеня па жнівень 2023 года з 11 увезеных партый у шасці былі знойдзены падробленыя дакументы”, – адзначылі ў расійскім ведамстве.
Беларускае Радыё Рацыя.
Фота: pixabay.com.
