Агляд прэсы: Усё пад кантролем?
Лукашэнка заклікае Арменію „сур’ёзна падумаць” пра выхад з АДКБ. Рада Бяспекі ААН заклікала Расею спыніць спекуляцыі на тэму свабоды рэлігіі ва Украіне. Прэм’ер-міністрам Гішпаніі зноў абраны Педра Санчэс. Падрабязнасці свежых матэрыялаў замежнай прэсы даведаемся ў аглядзе Вольгі Сямашкі.
Лукашэнка заклікаў Арменію «сур’ёзна разгледзець» свае магчымасці, перш чым рабіць крокі, якія могуць прывесці да выхаду Арменіі з Арганізацыі Дагавора аб калектыўнай бяспецы (АДКБ). «У аўторак прэм’ер-міністр Арменіі Нікол Пашынян заявіў, што не возьме ўдзелу ў саміце АДКБ, які павінен адбыцца ў Менску 23 лістапада», – перадае каўказскае незалежнае выданне OC Media.
«Пасля заявы Пашыньяна Масква выказала сваё «шкадаванне», а прэс-сакратар Крамля Дзмітрый Пяскоў заявіў журналістам, што Расея гэта разумее. У сераду Пашынян выказаў, што не будзе ўдзельнічаць у саміце АДКБ, бо блок не прызнае межаў Арменіі. Пашынян таксама растлумачыў, што Арменія закупляе зброю на Захадзе і ў іншых краінах, таму што яе партнёры ў сферы бяспекі, у тым ліку па аб’ектыўных прычынах, не могуць прадаваць ёй жа зброю і боепрыпасы. З моманту поўнамаштабнага ўварвання Расеі ва Украіну ў 2022 годзе краіна з цяжкасцю набывала зброю, неабходную для вядзення вайны. Пры гэтым артыкул 4 статута АДКБ прадугледжвае, што члены блока абавязаны ўзаемна абараняць адзін аднаго ад знешніх пагроз і нападаў. Адносіны Арменіі з Расеяй пагаршаюцца пасля Другой нагорна-карабахскай вайны ў 2020 годзе, і Ерэван, здаецца, адштурхоўваецца ад кіраванага Масквой АДКБ і Садружнасці Незалежных Дзяржаў на карысць больш цесных сувязяў у галіне бяспекі з Захадам. Пашынян і іншыя высокапастаўленыя чыноўнікі неаднаразова адмаўляліся ад удзелу ў пасяджэннях АДКБ і СНД. Арменія адмовілася ад правядзення сумесных міратворчых вучэнняў АДКБ і восенню вытрымала два вучэнні АДКБ. Ерэван таксама адмовіўся накіраваць свайго прадстаўніка на пасаду намесніка генеральнага сакратара АДКБ у сакавіку», – канстатуе каўказскае выданне.
* * *
17 лістапада 2023 года адбылося пасяджэнне Рады бяспекі ААН, прысвечанае свабодзе рэлігіі ва Украіне. Па выніках слуханняў быў апублікаваны выніковы прэс-рэліз, дзе краін ААН раскрытыкавалі Расейскую Федэрацыю за чарговую спробу адцягнуць увагу ад сваёй агрэсіі супраць Украіны, запатрабаваўшы сустрэчы. «Прадстаўніца Украіны, выступаючы па выніках сустрэчы, наагул заявіла, што Руская Праваслаўная Царква сама прымала ўдзел у акупацыі і дабівалася анэксіі тэрыторыі яе краіны», – піша міжнароднае выданне Shaltnotkill.
«Расея з усіх сіл спрабуе пазіцыянаваць сябе абаронцай Украінскай Праваслаўнай Царквы ва Украіне, выкарыстоўваючы пры гэтым Савет бяспекі ААН. У ААН і ў краінах членах сапраўды занепакоеныя ростам напружанасці ў рэлігійнай сферы ва Украіне. Аднак амаль усе спікеры дастаткова жорстка адказваюць Расеі, па-першае, лічачы асноўнай прычынай эскалацыі напружанасці поўнамаштабнае ўварванне РФ ва Украіну, па-другое, патрабуюць вывесці войскі, па-трэцяе, просяць спыніць маніпуляваць тэмай свабоды рэлігіі і самой Радай бяспекі як інструментам прасоўвання сваіх наратываў. Відаць, што Расеі ўвогуле ніхто ўжо не верыць і маюць зносіны з прадстаўнікамі Расеі як з нашкодзіўшымі асобамі», – рэзюмуе міжнароднае выданне.
Прэм’ер-міністрам Гішпаніі зноў абраны Педра Санчэс. У чацвер 179 з 350 дэпутатаў парламента прагаласавалі за зацвярджэнне Урада ў складзе узначаленай ім Іспанскай сацыялістычнай працоўнай партыі і левай партыі Сумар. Перавага была невялікай: яна стала магчымай у тым ліку дзякуючы галасам ад малых рэгіянальных партый – у абмен на абяцанне амністыі каталонскім сепаратыстам. Свой пратэст супраць такой ініцыятывы выказалі як апазіцыя, так і шырокая грамадскасць: сотні тысяч грамадзян выйшлі ў мінулыя выходныя на вуліцы ў знак пратэсту. «Дзякаваць Богу, Гішпанія не ўстане ў адзін шэраг з Венгрыяй, – з палёгкай уздыхае венская Der Standard.
«Для Еўропы абранне Санчэса – добрая вестка. І магчымым яно стала не ў апошнюю чаргу, дзякуючы ўзвядзенню пажарнай сцяны супраць ультраправай партыі Vox. Паколькі кансерватыўная Народная партыя сфармавала з Vox у шэрагу муніцыпалітэтаў і рэгіёнаў, а таксама альянс на агульнанацыянальным узроўні, то гэта тычыцца і Народнай партыі. Поспех Санчэса засцерагае адну з найбуйных краін Еўразвяза ад далягляду займець урад, падобны да таго, што засядае ў Венгрыі», – падкрэслівае аўстрыйскае выданне.
* * *
Расследаванне, праведзенае Міжнародным кансорцыумам журналістаў-расследавальнікаў (ICIJ) і іншымі СМІ, выявіла сумнеўныя транзакцыі кіпрскіх пастаўшчыкоў фінансавых паслуг. Больш за 270 журналістаў з 54 краін прааналізавалі вялізныя аб’ёмы дадзеных і выявілі, якім чынам расейскія алігархі выкарыстоўваюць Кіпр у якасці месца для ўтойвання і прымнажэння сваіх актываў у абыход санкцый. Кіпрскае выданне газеты Kathimerini піша пра тое, якія крокі зараз неабходна зрабіць у першую чаргу.
«У эканоміцы з сур’ёзнай праблемай плацежнага балансу, якая з’яўляецца адным з двух найбольш верагодных фактараў пачатку наступнага эканамічнага крызісу на Кіпры, кіраванне замежнымі інвестыцыямі і прыцягненне «добрых» інвестараў маюць вырашальнае значэнне. Першым і неабходным крокам да выратавання нашай рэпутацыі і нашай эканомікі стала б стварэнне аб’яднанага і адзінага ўпраўлення па кантролі і рэгуляванні фінансавых практык. Наяўнасць такога органа таксама спрыяла б распрацоўцы адзінай палітыкі ў адносінах да замежных інвестыцый, што стала б наступным крокам – з рэалістычным часовым гарызонтам (калі мы на гэта пойдзем) у 18 месяцаў», – адзначае кіпрскае выданне.
Агляд сусветнай прэсы падрыхтавала Вольга Сямашка.
Беларускае Радыё Рацыя
