Самойла дапамог гандбалістам „Віслы” здабыць другую перамогу ў Лізе чэмпіёнаў
Гандбалісты польскай „Віслы” з Плоцка з беларусам Кірылам Самойлам святкавалі другую вікторыю ў групавым раундзе Лігі чэмпіёнаў і працягваюць барацьбу за выхад у плэй-оф. У гасцявым паядынку 9-га тура „Вісла” перайграла аўтсайдэра групы B славенскі „Цэле” з лікам 30:25. У актыве Кірыла Самойлы два галы, зараз на яго рахунку 5 закінутых мячоў у Лізе чэмпіёнаў. У матчы першага круга польскі клуб абыграў славенцаў у Плоцку дакладна з такім жа лікам – 30:25. Сёння, 30 лістапада, вечарам адбудзецца сустрэча двух лідараў групы – венгерскі „Веспрэм”, за які выступае беларус Мікіта Вайлупаў, прыме на сваёй пляцоўцы іспанскую „Барселону”.
Протас аддаў дзве галявыя перадачы ў пераможным матчы „Вашынгтона”
Беларускі форвард „Вашынгтона” Аляксей Протас правёў чарговы выніковы паядынак у рэгулярным чэмпіянаце Нацыянальнай хакейнай лігі. Раніцай па беларускім часе адбылася сустрэча „Лос-Анджэлеса” і „Вашынгтона”, якая завяршылася перамогай „сталічных” з лікам 2:1. У абодвух галах „Кэпіталз” паўдзельнічаў беларускі нападнік клуба Аляксей Протас: у сярэдзіне першага перыяду наш хакеіст дапамог вызначыцца Энтані Манта, а ў канцы другой трэці беларус асіставаў Конару Макмайклу пры пераможным узяцці брамкі „каралёў”. Усяго Пратас правёў на лёдзе 12 хвілін, выканаў 1 кідок, заблакаваў 1 стрэл саперніка і скончыў сустрэчу з паказчыкам карыснасці „+1”. У 18 матчах цяперашняга сезона Аляксей набраў 9 (2+7) выніковых балаў. „Вашынгтон”, які выйграў шэсць паядынкаў з апошніх васьмі, займае восьмае месца ва Усходняй канферэнцыі НХЛ з 24 ачкамі ў актыве.
Зборная Беларусі ўзнялася на 95-е месца ў рэйтынгу ФІФА
Зборная Беларусі ўзнялася на 95-ю пазіцыю ў новым рэйтынгу Міжнароднай федэрацыі футбола (ФІФА). У мінулым спісе, апублікаваным 26 кастрычніка, беларусы займалі 100-е месца. За мінулы час падначаленыя іспанскага спецыяліста Карласа Алоса Ферэра паспяхова правялі два заключныя паядынкі адборавага турніру чэмпіянату Еўропы, абыграўшы зборныя Андоры і Косава з аднолькавым лікам – 1:0. Пасля гэтых перамог зборная Беларусі перамясцілася на пяць ступеняў уверх. Лістападаўскі рэйтынг ФІФА ўзначальвае Аргенціна, на другой пазіцыі Францыя, трэцяе месца займае Англія, за ёй ідзе Бельгія, замыкае першую пяцёрку Бразілія.
Нарвегія разграміла Грэнландыю на чэмпіянаце свету па гандболе
Завяршыўся першы гульнявы дзень жаночага чэмпіянату свету па гандболе. Зборная Нарвегіі святкавала самую буйную перамогу серады разграміўшы каманду Грэнландыі 43:11. Лепшым бамбардзірам сустрэчы стала Каміла Херэм, якая вызначылася 7 разоў. Зборная Іспаніі ўпэўнена разабралася з камандай Казахстана 34:17, а бразільянкі не пакінулі шанцаў украінкам 35:20.
Беларускае Радыё Рацыя
