Жыхары Старога Ляўкова супраць будаўніцтва звалкі смецця (абноўлена)
Стараста Гайнаўскага павету Міраслаў Раманюк падтрымаў патрабаванні жыхароў Старога Ляўкова, якія пратэстуюць супраць стварэння звалкі смецця на зямельным ўчасту ў іх мясцовасці. Паводле яго слоў, яшчэ сёння накіруе ў самаўрадавую касацыйную калегію ў Беластоку адпаведны зварот з далучанымі петыцыямі жыхароў Старога Ляўкова і ваколіц.
– Сёння падрыхтуем рашэнне, якое накіруем у Беласток. Да яго далучым скаргі і ўсю інфармацыю. Паколькі мясцовыя жыхары не хочуць гэтага будаўніцтва, мы, як павятовы самаўрад, правінны прымаць іх бок.
Як мы ўжо паведамлялі раней, павятовае стараства ў Гайнаўцы дазволіла смеццеапрацоўчаму прадпрыемству МПО з Беластоку, стварыць звалку смецця на зямельным участку ў Старым Ляўкове. Мясцовых жыхароў абурае, што рашэнне было прынята без інфармавання і кансультацыі з імі ды з гміннымі ўладамі.
* * *
Жыхары Старога Ляўкова, што ў гміне Нараўка на Падляшшы, пратэстуюць супраць планаў мясцовых уладаў па стварэнні звалкі смецця на палях побач з іх мясцовасцю. Дазвол на будаўніцтва звалкі беластоцкаму прадпрыемству МПО дало павятовае стараства ў Гайнаўцы.
Сёння мясцовыя жыхары сустрэліся з гайнаўскім старастам Міраславам Раманюком, і перадалі яму заявы з просьбай адмяніць прынятае рашэнне – кажа адзін з заяўнікаў Міраслаў Барэчка:
– Мясцовыя жыхары сабралі каля 350 подпісаў супраць будаўніцтва звалкі. Мы былі на размове са старастам, ён можа адклікаць гэтае рашэнне.
Дазвол беластоцкаму прадпрыемству МПО на звалку і пераапрацоўку смецця на зямельным участку ў Старым Ляўкове быў выдадзены не самім старастам, а ягонай падначаленай. Але, як адзначае Міраслаў Раманюк, рашэнне згоднае з законам.
Сёння завяршаецца тэрмін, калі гайнаўскі стараста можа адмяніць сваё рашэнне і паведаміць пра гэта ў вышэйшыя органы самакіравання. Жыхары Старога Ляўкова лічаць, што блізкасць звалкі – шкодная для здароўя, яны абураныя, што дазвол на яе будаўніцтва выдавалі без кансультацыі з імі, а таксама з гміннымі ўладамі.
Калі дазвол не будзе адкліканы, ён будзе дзейнічаць да траўня 2025 года.
Анна Шайкоўская, Беларускае Радыё Рацыя
Фота b-m.pl
Глядзіце таксама
