Мацнейшыя выжывуць
На вуліцы – шэрань… Накрапвае дождж… У вокны лезе туман…
Кіраўнік дзяржавы разгледзеў кадравыя пытанні і падпісаў чарговы дэкрэт, які народ вяла абмяркоўвае ў фэйсбуку, бо ёсць больш цікавая тэма – падзенне расейскага рубля і закупы ў суседняй краіне, якую раней не разглядалі як меку шапаголіка. Усё змяняецца і, маючы долары ў кішэні, можна рвануць на ўсход за танным ламінатам ці новым аўто па вельмі “цікавым” кошце… А падчас у РФ знаходзіцца тое, чаго ў нас няма нават па высокіх коштах.
Імпартныя лекі. Чамусьці краіна ў цэнтры Еўропы не можа прадаць свайму грамадзяніну вельмі патрэбны нямецкі прэпарат. Гэта краіна вырашыла, што грамадзяніну пойдзе айчынны… Перажыве, маўляў. У грамадзяніна ніхто і пытаць не збіраўся, што яму патрэбна і што падабаецца. І калі за танным ламінатам ён можа спакойна паехаць у Смаленск ці Беласток, то лекі прасцей набыць у РФ (па беларускім рэцэпце). Былі б грошы… Ці ёсць грошы ў хворага чалавека на тыя лекі, якія насамрэч дапамагаюць утрымліваць рэмісію, ніхто не пытае. Тэма нецікавая. А чалавеку трэба і лекі набыць, і аказію ў Маскву знайсці, каб іх прывезці. Знаходзіцца аказія – свет не без добрых людзей, але… Пытанне застаецца.
Чаму мы так любім паразважаць пра праблемы суседзяў і не займаемся сваімі? І… Чаму ж мы так часта, даражэнькія, любім ствараць сабе праблемы там, дзе іх няма? І потым у дзяржаўнай прэсе прыгожа рапартаваць… Лекі даражэць не будуць! Ура! Чаму вы так вырашылі, спадарства? Бо Міністэрства аховы здароўя “прымае меры па недапушчэнні росту адпускных і рознічных цэн на лекі і медыцынскія вырабы”. Насамрэч? На якой падставе? Бо ўказ кіраўніка дзяржавы маецца на гэты конт. Цудоўна. Верым… Праўда, гэта можа тычыцца выключна айчынных прэпаратаў, што, як вядома, выпадаюць з сусветных законаў рынку: “У выпадку… завышэння цэн міністэрства будзе прымаць жорсткія захады, уключаючы закрыццё гандлёвых аб’ектаў…” Вось так.
А што ж з імпартнымі медыцынскімі прэпаратамі? Барысаўскі завод медыцынскіх прэпаратаў перамог у намінацыі «Вытворца медыцынскіх прэпаратаў» прэміі спажывецкага прызнання «Народная марка». Дзяржаўная прэса бадзёра рапартуе – народ галасуе за сваё… Вас не запыталі? Пэўна, вы не народ. Нейкая няправільная катэгорыя насельніцтва…
Зрэшты, гэта ўсё шэрань за вокнамі. На макраўзроўні ў нас усё цудоўна. Мы ж цывілізаваная (?) краіна ў цэнтры Еўропы? Напэўна… А лекі – гэта дробязі.
Мацнейшыя неадменна выжывуць! Старэча Дарвін меў рацыю… Напэўна.