Несупадзенне ў прасторы і часе
Аляксандр Лукашэнка падпісаў дэкрэт пра ўтрыманцаў, а ў Менску адкрылася выстава, прысвечаная самагонаварэнню. Навіновая палітра Беларусі ізноўку здзіўляе.
Здзіўляе і ўражвае сваёй неардынарнасцю ды актуальнасцю для красавіка 2015-га. Падчас здзіўляюць і навіны рэгіёнаў сваімі нечаканымі супадзеннямі.
Адныя і тыя ж “граблі” трапіліся вядоўцам у Гомельскай ды Менскай абласцях…
У пункце памежнага пропуску «Новая Гута» пры аглядзе аўтобуса Mercedes, які ажыццяўляў перавозку пасажыраў з Малдовы ў Расею, беларускія мытнікі і памежнікі заўважылі дзіўнае дызайнерскае рашэнне пры змене канструкцыі багажных палічак. Дэмантавалі і… выявілі 30 паўтаралітровых бутэлек каньяку дзесяцігадовай вытрымкі.
Салідна і… Нездарма ж менавіта з Малдовы ішоў транспарт? Класіка жанру. Кіроўца-малдаванін прызнаўся ў незаконным перамяшчэнні тавару ў прасторы. Каньяк на 6 мільёнаў канфіскаваны – не дзіва! Але і аўтобус коштам цэлых 250 мільёнаў… канфіскаваны таксама. Да пары да часу. Распачаты адміністрацыйны працэс.
Наступная гісторыя тычыцца хутчэй беларускіх алкагольных традыцый. У Маладзечна таксіст гандляваў гарэлкай (незаконна, канечне…) Прадукцыю ацанілі ў адзін мільён 860 тысяч беларускіх рублёў і канфіскавалі. “Арыштавалі” і машынку “Рэно-Логан”, у якой таксіст перавозіў гарэлку. Праверку праводзіць падатковая інспекцыя.
Утрыманцы, алкаголікі, памежнікі, кантрабандсты… А хтосьці дзесьці збіраецца ляцець на Марс… Мікра і макраўзровень ніколі не супадуць.