АКРА: Расходы Беларусі на абслугоўванне дзярждоўгу будуць расці
У будучыні расходы Беларусі на абслугоўванне дзярждоўгу будуць павялічвацца. Да такой высновы прыйшлі аналітыкі расейскага рэйтынгавага агенцтва АКРА.
Паводле адзнак АКРА, пазыковая нагрузка на эканоміку Беларусі на канец 2020 года склала каля 44% ВУП, што амаль удвая перавышае аналагічны паказчык у Расіі і Казахстане, аднак ніжэй, чым у сярэднім, чым у краінах, якія развіваюцца.
„На пачатак 2020 года дзяржаўны доўг Беларусі на 90% быў валютным, што з’яўляецца максімальным паказчыкам сярод разгляданых краін і павышае ўразлівасць краіны да валютнай пераацэнкі. Валютная пераацэнка, выкліканая абясцэньваннем нацыянальнай валюты, паслужыла асноўным драйверам росту дзярждоўгу ў 2020 годзе”, — адзначаюць спецыялісты рэйтынгавага агенцтва ў сваёй аналітычнай запісцы.
Згодна з іх разлікамі, аслабленне курсу нацыянальнай валюты Беларусі адносна долара ЗША ў 2020 годзе прывяло да росту дзярждоўгу з-за валютнай пераацэнкі на 22%.
„Гэтая акалічнасць зніжае прастору для фіскальнага манеўру ў будучыні, асабліва ў выпадку валатыльнасці валюты”, — мяркуюць аналітыкі АКРА.
Яны таксама звяртаюць увагу, што магчымасці Беларусі па рэфінансаванні дзярждоўгу зніжаюцца.
„Умовай захавання нізкіх расходаў на абслугоўванне доўгу з’яўляецца магчымасць яго рэфінансавання ў гэтых арганізацый, але гэта не гарантавана ў сілу таго, што некаторыя міжнародныя арганізацыі — крэдыторы Беларусі не плануюць фінансаванне новых праектаў у краіне”, — канстатуюць аналітыкі АКРА.
Выключэнне, адзначаюць яны, складае толькі Еўразійскі банк развіцця, гатовы нарошчваць інвестыцыйную актыўнасць у краіне з мэтай кампенсацыі выпадаючых інвестыцый.
„Аднак, як вынікае з заяваў прадстаўнікоў банка, аб’ём крэдытавання Беларусі сёлета дасягне краінавага ліміту, у сувязі з чым спатрэбіцца яго павелічэнне з боку ўрадаў краін — акцыянераў банка. Паводле ацэнак АКРА, гэты ліміт, хутчэй за ўсё, будзе павялічаны, аднак у далейшым роля рынкавых крыніц фінансавання ўзмоцніцца, што прывядзе да росту выдаткаў (Беларусі) на абслугоўванне дзярждоўгу”, — лічаць аналітыкі АКРА.
Яны чакаюць, што ў Беларусі адбудуцца стагнацыя і рост узроўню дзярждоўгу.
„У Беларусі, паводле ацэнак АКРА, рост ВУП у 2021 годзе складзе 0,5% пры дэфіцыце бюджэту на ўзроўні каля 2-3% ВУП, у сувязі з чым дзярждоўг у краіне павялічыцца да 46% ВУП”, — прагназуюць аналітыкі АКРА. Нагадаем, восенню мінулага года агенцтва АКРА пагоршыла прагноз па суверэнных рэйтынгах Беларусі, прысвоіўшы па іх „негатыўны” прагноз.
