Анатоль Шапавалаў: Бюджэт губляе курэй, якія неслі залатыя яйкі
Лідар віцебскага аддзялення РГА “Перспектыва” Анатоль Шапавалаў распавядае, чаму сёння чыноўнікі з аблвыканкамаў падтрымліваюць прадпрымальнікаў.
Анатоль Шапавалаў: У мінулую нядзелю ў Віцебску, як і па ўсёй Беларусі, прадпрымальнікі практычна не працавалі. Выйшлі на працу толькі тыя, у каго былі дакументы на тавар. Іх не вельмі шмат – каля 20 працэнтаў ад агульнай колькасці.
РР: Што далей?
Анатоль Шапавалаў: Далей прадпрымальнікі будуць чакаць, бо ўжо ніхто нікому не верыць. Пакуль не будзе афіцыйнага дакумента, што прадстаўнікі малога бізнеса могуць спакойна працаваць, на работу людзі не пойдуць.
РР: Ёсць інфармацыя, што магілёўскіх прадпрымальнікаў чыноўнікі з мясцовага аблвыканкама запэўнілі, што тыя могуць працаваць у гэтым месяцы поўнасцю па правілах мінулага…
Анатоль Шапавалаў: Нам ніхто нічога не тлумачыў, але я ведаю, што аблвыканкамы насамрэч выступаюць за тое, каб прадпрымальнікі працавалі так, як і раней.
РР: Губляюць курэй, якія нясуць для мясцовага бюджэта залатыя яйкі?
Анатоль Шапавалаў: Безумоўна. Нават на прадпрымальніцкіх форумах чыноўнікі выступалі і выходзілі з прапановамі, каб нам далі спакойна працаваць. Выканкамы, бюджэты баяцца згубіць вялізныя грошы! Дзе яны іх возьмуць узамен? У дзяржаўных прадпрыемстваў, якія самі колам стаяць і чакаюць, каб хто ім грошай падкінуў?
РР: Але ж, здаецца, малому бізнесу далі невялікую палёгку да чэрвеня гэтага году?
Анатоль Шапавалаў: Так, прыпынілі дзеянне дакумента па штрафных санкцыях, але ў той час адкрылі шырокія перспектывы для новых штрафаў. У гэтым плане амаль нічога не змянілася. А людзі зараз граматныя, усе разумеюць, што адбываецца. Таму пакуль будзем чакаць, што там урада распрацуе і да чаго прыйдзе. Бо, калі ў Расеі няма сертыфікатаў, то чаму яны павінны быць у Беларусі? У нас жа адзіны саюз і адзіная эканамічная прастора.
РР: На ваш погляд, ці могуць адмяніць Указ N-222, які рэгламентуе дзейнасць прадпрымальнікаў па новых правілах?
Анатоль Шапавалаў: Мне падаецца, што не для таго яго прымалі, каб так хутка адмяняць. Па меншай меры год дакумент павінен адпрацаваць. Але, можа быць, нешта прыдумаюць.
Кастусь Заблоцкі, Беларускае Радыё Рацыя
Глядзіце таксама
