Аўстрыйскі Raiffeisen Bank абверг паведамленні аб намеры прадаць „Прыёрбанк”
Аўстрыйскі Raiffeisen Bank International абверг паведамленні пра нібыта існы намер прадаць „Прыёрбанк”, якія з’явіліся 23 лютага на некаторых беларускіх інтэрнэт-рэсурсах і ў тэлеграм-каналах.
„RBI не праводзіць перамоў адносна продажу даччынага банка ў Беларусі, а таксама не дае паўнамоцтвы трэцяму боку на такія дзеянні”, — гаворыцца ў паведамленні на сайце „Прыёрбанка”.
Адзначаецца, што, „нягледзячы на некаторыя абмежаванні”, фінансавыя вынікі „Прыёрбанка” застаюцца на высокім узроўні.
„Беларускі рынак па-ранейшаму забяспечвае значны прыбытак і захоўвае патэнцыял для далейшага росту”, — падкрэсліваецца ў каментары.
„Прыёрбанк” — самы буйны беларускі камерцыйны банк з заходнееўрапейскім капіталам, уваходзіць у лік сістэмна значных банкаў краіны.
Доля Raiffeisen у статутным фондзе „Прыёрбанка” складае 87,74%, Дзяржкаммаёмасць Беларусі валодае 6,31% акцый, іншыя юрыдычныя асобы — 1,11%, фізасобы — 4,84%.
