Банкі могуць змяніць нормы крэдытных дагавораў
Праверка, якую ў дачыненні да банкаў ініцыявала Міністэрства антыманапольнага рэгулявання і гандлю, можа прывесці да перагляду нормаў крэдытных дагавораў. Такое меркаванне выказаў інфармаваны суразмоўца БелаПАН у фінансавых колах.
Ён звярнуў увагу, што яшчэ ў 2017 годзе антыманапольнае ведамства пачало праяўляць цікавасць да зместу крэдытных дагавораў, якія заключаюць банкі.
„Сапраўды, некаторыя банкі „перагінаюць” з крэдытнымі дамовамі і ўстройваюць „прыгоннае права” — выдаючы крэдыты, абмяжоўваюць карпаратыўнага кліента ў праве свабодна карыстацца фінансавымі паслугамі іншых банкаў„, — адзначыў суразмоўца БелаПАН у фінансавых колах.
Разам з тым ён удакладніў, што ў некаторых выпадках узаемаабумоўліванне выдачы крэдыту і адкрыцця разліковага рахунку ў адным і тым жа банку можа быць апраўданае. „Банкі павінны кантраляваць рызыкі, бачыць грашовыя патокі кліента і пераканацца ў тым, што пазычальнік іх не падманвае і своечасова верне крэдыт„, — падкрэсліў суразмоўца ў фінансавых колах.
Пры гэтым ён адзначыў, што банкі павінны ўзважана падыходзіць да ацэнкі рызык. „Калі выдача крэдыту ў адным банку азначае фактычную забарону на выкарыстанне паслуг іншых банкаў, то такія нормы дакладна прыйдзецца карэктаваць. Калі ж нормы крэдытных дагавораў кампенсуюць рызыкі банка, але не забараняюць кліенту карыстацца паслугамі іншых банкаў, то ў гэтым выпадку прэтэнзій з боку МАРГ да банка, напэўна, не будзе„, — выказаў меркаванне эксперт БелаПАН у фінансавых колах.
Нагадаем, да 19 верасня камерцыйныя банкі Беларусі абавязаныя адказаць на запыт Міністэрства антыманапольнага рэгулявання і гандлю. У сваім лісце МАРГ просіць паведаміць, ці прысутнічае ў крэдытных дагаворах банкаў умова аб абавязковым атрыманні крэдытаатрымальнікам згоды крэдытадаўцы на адкрыццё разліковых рахункаў і на афармленне крэдытаў у іншых банках.
Акрамя гэтага, МАРГ просіць банкі, якія маюць такі пункт у крэдытных дагаворах, растлумачыць, з чым звязанае ўключэнне згаданай умовы. Таксама МАРГ просіць банкі выказаць меркаванне пра тое, ці лічаць яны наяўнасць гэтай умовы ў крэдытных дагаворах „праявай нядобрасумленнай канкурэнцыі”. БелаПАН
