Астравецкая АЭС — не апошняя атамная станцыя ў Беларусі?
На тэрыторыі Беларусі ў будучыні можа быць пабудаваная большая колькасць атамных электрастанцый, заявіў на прэс-канферэнцыі 25 студзеня ў Менску старшыня прэзідыума Нацыянальнай акадэміі навук (НАН) Уладзімір Гусакоў.
„Мы лічым, што гэта не апошняя атамная станцыя на тэрыторыі Беларусі, — сказаў ён. — Можа быць, я апярэджваю, але мы мяркуем, што будуць стварацца яшчэ атамныя станцыі, можа быць, у 2030 годзе”.
„Гэта аб’ектыўна, таму што калі мы ставім задачу па рэзкім нарошчванні ВУП і павышэнні ўзроўню дабрабыту нашага народа, мы павінны абавязкова нарошчваць сваю энергетыку. Якая эфектыўнасць энергетыкі і ўзровень энергазабеспячэння, такая і эфектыўнасць эканомікі. У нас сёння пакуль недастатковае энергазабеспячэнне і энергаэфектыўнасць, таму нам трэба ў гэтым напрамку вельмі актыўна працаваць”, — дадаў кіраўнік НАН.
Гусакоў адзначыў, што акадэмія навук адказвае за навуковае суправаджэнне будаўніцтва Беларускай АЭС, а пасля запуску станцыі працягне праводзіць на ёй навуковую працу ў галіне ядзернай энергетыкі.
Акрамя гэтага, сказаў навуковец, НАН займаецца развіццём тэхналогіі па атрыманні энергіі з іншых крыніц. „Мы актыўна працуем у галіне сонечнай, вадароднай энергетыкі, энергетыкі мясцовых рэсурсаў, нетрадыцыйнай энергетыкі — на перспектыву”, — падкрэсліў Гусакоў.
Беларуская АЭС будуецца пры ўдзеле Расеі пад Астраўцом у Гарадзенскай вобласці. Яна будзе складацца з двух энергаблокаў сумарнай электрычнай магутнасцю да 2.400 мегават. Для яе будаўніцтва выбраны праект АЭС-2006 — тыпавы расійскі праект атамнай станцыі новага пакалення. Увод у эксплуатацыю першага энергаблока АЭС запланаваны на 2019 год, другога — на 2020 год.
belapan.by
Глядзіце таксама
