Беларусь прапаноўвае Ілану Маску тэставаць сэрвіс Robotaxi ў Менску
МЗС Беларусі прапануе заснавальніку кампаніі Tesla Ілану Маску пратэставаць новы прадукт кампаніі Robotaxi ў Менску. Адпаведны запіс з’явіўся ў англамоўным „Твітэры” беларускага знешнепалітычнага ведамства.
„Ілан Маск, вы афіцыйна можаце пачаць тэставанне вашай сістэмы Robotaxi ў Менску”, — гаворыцца ў паведамленні.
Напярэдадні Tesla анансавала запуск у наступным годзе сэрвісу Robotaxi — сэрвіс беспілотных аўтамабіляў, у якім плануецца выкарыстоўваць як уласны аўтапарк кампаніі, так і электракары, якія належаць прыватным асобам.
Як паведамлялася, Аляксандр Лукашэнка паставіў перад беларускімі навукоўцамі задачу скончыць распрацоўку айчыннага электрамабіля ў 2018 годзе.
Улетку 2017 года Нацыянальная акадэмія навук прадставіла эксперыментальны ўзор беларускага электракара, створанага спецыялістамі Аб’яднанага інстытута машынабудавання на базе легкавога аўтамабіля Geely SC7.
31 жніўня таго ж года на нарадзе па развіцці беларускага аўтамабілебудавання Лукашэнка расказаў пра тое, як ён пратэставаў амерыканскі электрамабіль Tesla, і даручыў айчынным распрацоўшчыкам выкарыстоўваць яго ў якасці ўзору, да якога неабходна імкнуцца.
Лукашэнка адзначыў, што падрабязна азнаёміўся з эксперыментальным узорам беларускага электракара. „Я з ім уважліва азнаёміўся, паглядзеў усе вашыя дэталі. Не ведаю, наколькі высокі ўзровень рухавіка, які вы стварылі, хадавая частка і гэтак далей, але выглядае вонкава прыстойна”, — сказаў кіраўнік дзяржавы. Разам з тым ён падкрэсліў, што „да ўзроўню Tesla яшчэ далёка” і неабходная „далейшая тэхнічная праца ў гэтым кірунку”.
Фота NewsOne
