„Беларусбанк” увёў камісію за правядзенне шэрагу плацяжоў у сваіх касах
„Беларусбанк” 1 кастрычніка ўвёў камісію за правядзенне абмежаванага спіса плацяжоў у сваіх касах. Камісія за кожны плацеж наяўнымі ў касе банка за навучанне, паркоўку, паслугі інтэрнэту і іншыя такія плацяжы складзе 1 рубель.
Пры гэтым, як звяртае ўвагу аддзел камунікацый банка, найбольш запатрабаваныя плацяжы, якія насельніцтва ажыццяўляе ў яго аддзяленнях, у прыватнасці аплата камунальных паслуг і гарадскога тэлефона, будуць ажыццяўляцца без камісіі.
Узнагарода не будзе спаганяцца з ветэранаў Вялікай Айчыннай вайны, а таксама за плацяжы ў бюджэт (падаткі, зборы, пошліны, штрафы), на карысць грамадскіх аб’яднанняў, на дабрачынныя рахункі, у выглядзе ўзносаў страхавымі агентамі, на карысць ААТ „АСБ” Беларусбанк”.
Як указвае банк, усе плацяжы, за якія будзе брацца ўзнагарода, можна ажыццявіць у каналах дыстанцыйнага банкаўскага абслугоўвання бясплатна: інтэрнэт-банкінгу, М-банкінгу, інфакіёсках.
16 ліпеня „Беларусбанк” адмяніў збіранне ўзнагароды за рэгістрацыю ў сістэме інтэрнэт-банкінгу, у тым ліку анлайн-рэгістрацыю, і выдачу карты кодаў пры рэгістрацыі ў сістэме.
Банк таксама даў магчымасць аплаты тавараў і паслуг з выкарыстаннем мабільных тэлефонаў з дапамогай сэрвісаў Belarusbank Pay, Samsung Pay, а таксама QR-кода, у тым ліку ў дадатку „Мабільны банкінг паслугі” ў сістэме АРІП.
„Павелічэнне долі безнаяўных плацяжоў, прымяненне сучасных тэхналогій і спосабаў аплаты — ключавыя кірункі развіцця сістэмы безнаяўных разлікаў у краіне. „Беларусбанк” распрацоўвае інавацыйныя прадукты, пастаянна ўдасканальваючы дзейныя, з мэтай падвышэння зацікаўленасці насельніцтва ў захоўванні грашовых сродкаў на банкаўскіх рахунках, а таксама для фарміравання даверу кліентаў да сучасных плацежных інструментаў”, — гаворыцца ў паведамленні.
На сённяшні дзень амаль 2 млн кліентаў „Беларусбанка” карыстаюцца інтэрнэт-банкінгам, каля 500 тыс. — паслугамі М-банкінгу, доля безнаяўных плацяжоў, якія ажыццяўляюцца ў ДБА, складае 74,1%.
У 2016 годзе Нацыянальны банк распрацаваў стратэгію развіцця лічбавага банкінгу ў Беларусі на 2016—2020 гады. У адпаведнасці з ёй доля безнаяўнага грашовага абароту ў рознічным тавараабароце да пачатку 2021 года павінна быць не меншай за 40% (у 2017-м — 35,4%, прырост за год склаў 5,5%). Таксама да канца дзеяння стратэгіі ў кожным банку доля кліентаў — фізічных асоб, падключаных да каналаў дыстанцыйнага банкаўскага абслугоўвання, павінна складаць не менш за 60%.
Глядзіце таксама
