Беларусы пра рост коштаў: Менш есці будзем, здаравее будзем
У паўтары разы паскорыўся рост спажывецкіх коштаў у Беларусі, па дадзеных Белстату, у верасні ў параўнанні з папярэднім месяцам. З пачатку года кошты павялічыліся амаль на 14 працэнтаў. Але ёсць тавары, якія крыху патаннелі ў параўнанні з папярэднім месяцам.
Мы запыталіся ў жыхароў Глыбокага, ці заўважылі яны змены коштаў на прадукты харчавання і прамысловыя тавары ў той або іншы бок і ці сталі яны менш набываць якіх-небудзь тавараў.
– Я заўважыла, што ў нас панізіліся заробкі. Жывем неяк – выкарасківаемся. Глядзім, дзе ніжэйшыя кошты, там і бярэм.
– Мясных прадукатаў менш стала браць, а хлеб і малако – гэта ж патрэбна. Садавіна, гародніна – свая. А мяса, кажуць, шкодна есці. Менш есці будзем, здаравее будзем.
– Я не звяртаю на гэта ўвагі, бо бессэнсоўна. Раней пра павышэнне коштаў папярэджвалі. А цяпер спантанна ўсё. Кілаграм мяса – 170 тысяч і як я яго набываць буду, калі заробак у мяне 2 мільёны.
– Не звяртала на гэта ўвагі. Але, калі разлічваешся ля касы за ўсё адразу, усё больш і больш трэба плаціць.
Сярод харчовых тавараў заўважна павялічыўся кошт гародніны, садавіны і гарбаты. Але патаннелі бульба , макаронныя вырабы, пшанічная мука і яйкі. Сярод нехарчовых тавараў падаражалі бензін, медыкаменты і пісьмовыя прылады . На абутак, дываны і дывановыя вырабы кошты знізіліся.
Беларускае Радыё Рацыя, Таццяна Смоткіна, Глыбокае
Глядзіце таксама
