„БЕЛДЖЫ” выпусціў маладзёжны красовер Geely Coolray
Завод „БЕЛДЖЫ” выпусціў новы красовер – Geely Coolray (SX-11). Аўтамабіль 12 лютага паказалі кіраўніку Адміністрацыі Прэзідэнта Ігару Сергяенку перад яго сустрэчай з калектывам прадпрыемства.
Паводле слоў генеральнага дырэктара „БЕЛДЖЫ” Генадзя Свідзерскага, новы Geely – гэта маладзёжны красовер. Яго агрэсіўны дызайн падкрэсліваюць карбонавыя люстэркі і панарамны верх. Аўтамабіль аснашчаны сістэмай аўтапаркоўкі, інтэлектуальным блізкім і далёкім святлом. Гэта пярэднепрывадны красовер з 1,5-літровым трохцыліндравым турбарухавіком і 7-ступеньчатай рабатызаванай каробкай перадач. Расход у такой машыны 6,1 л на 100 км. Плануецца, што цэны на Geely Coolray будуць значна ніжэйшыя, чым на Geely Atlas.
Пасля невялікай прэзентацыі мадэльнага рада аўтамабіляў Geely кіраўнік Адміністрацыі азнаёміўся з работай прадпрыемства, наведаўшы цэхі зваркі, зборкі і афарбоўкі.
Цяпер на прадпрыемстве працуюць больш як 1,3 тыс. чалавек. Сярэдняя зарплата тут складае Br1237. У 2019 годзе аб’ём прамысловай вытворчасці на заводзе перасягнуў Br605 млн – гэта больш за 20,1 тыс. аўтамабіляў. З іх рэалізавана 17,6 тыс. Большасць машын прададзена ў Расеі (10,7 тыс.), амаль 7 тыс. – у Беларусі. Чысты прыбытак „БЕЛДЖЫ” за мінулы год склаў Br27,3 млн.
