Да страйку на „Беларуськаліі” далучыліся больш як 50 шахцёраў
Да страйку на ААТ „Беларуськалій” далучылася больш за 50 шахцёраў, паведаміў БелаПАН сустаршыня страйкама прадпрыемства Анатоль Бокун.
Сам ён толькі сёння вярнуўся да працы ў страйкаме пасля 55 сутак адміністрацыйнага арышту за ўдзел у некалькіх несанкцыянаваных мерапрыемствах.
„Да страйку далучаюцца практычна кожны дзень, сёння, напрыклад, два чалавекі далучаліся”, — распавёў Бокун. Пры гэтым ён адзначыў: тым, хто знаходзіцца ў страйку, аказваецца маральная падтрымка і матэрыяльная дапамога. „Ёсць неабыякавыя, і дапамога аказваецца”, — адзначыў Бокун.
Страйкам правёў апытанне на тэму: колькі работнікаў павінна сысці ў страйк, каб іх падтрымалі на прадпрыемстве? Большасць рэспандэнтаў адказалі, што такіх работнікаў павінна быць 500. Многіх спыняе ад удзелу ў страйку страх страціць працу і прыбытак, а таксама адсутнасць салідарнасці з боку калегаў.
Паводле слоў Бокуна, у жніўні страйк падтрымлівала 6.300 работнікаў. „І гэтыя людзі нікуды не зніклі, яны знаходзяцца на прадпрыемстве, проста іх волю зламалі. Але пратэст унутры іх застаўся. Трэба, каб людзі пераасэнсавалі сітуацыю вакол, праявілі свае лепшыя чалавечыя якасці, здзейснілі правільны ўчынак”, — лічыць сустаршыня страйкама. „Магчыма, пройдзе нейкі час, і яны знойдуць у сабе сілы, каб далучыцца да страйку і перастаць працаваць на рэжым”, — дадаў Бокун.
Анатоль Бокун працаваў механікам аддзялення згушчэння сільвінітавай абагачальнай фабрыкі першага рудаўпраўлення. Адміністрацыя ААТ „Беларуськалій” звольніла яго „за парушэнне працоўнай дысцыпліны, таму што ён не хадзіў на працу без уважлівай прычыны”. Звальненне Бокуна ў страйкаме расцэньваюць як рэпрэсіі.
17 жніўня на прадпрыемстве была абвешчаная забастоўка. Шахцёры запатрабавалі прызнаць вынікі выбараў прэзідэнта несапраўднымі, прыцягнуць Аляксандра Лукашэнку і кіраўніка Цэнтрвыбаркама Лідзію Ярмошыну да адказнасці за злачынства супраць народа і фальсіфікацыю выбараў, вызваліць усіх палітвязняў і ўдзельнікаў мірных акцый, прызнаць усе пастановы і прысуды, вынесеныя ў дачыненні да іх, неабгрунтаванымі і незаконнымі.
Глядзіце таксама
