Дэвальвацыя расейскага рубля пагоршыць экспартныя магчымасці Беларусі
Дэвальвацыя расейскага рубля з-за яго вагі ў замежнагандлёвых разліках Беларусі можа аказаць значны ўплыў на эканоміку краіны.
Беларускі ўрад вядзе перамовы з расейскім урадам аб умовах пастаўкі ў Беларусь расейскіх нафтапрадуктаў, а таксама аб дзяржкрэдыце ў 1 млрд даляраў для рэфінансавання дзяржаўнага доўгу Беларусі, працягваючы курс на зніжэнне аб’ёму даўгавых абавязацельстваў. Нягледзячы на важнасць гэтых задач, дэвальвацыя расейскага рубля з-за яго вагі ў замежнагандлёвых разліках Беларусі акажа больш значны ўплыў на эканоміку Беларусі, чым умовы крэдытавання і паставак нафтапрадуктаў, піша thinktanks.by.
Ужо былы намеснік старшыні ўрада Мацюшэўскі расказаў, што беларускі ўрад вядзе перамовы з расейскім аб дзяржкрэдыце, пацвердзіўшы інфармацыю расейскага Мінфіна. Па словах Мацюшэўскага (як і паводле заяў расейскага Мінфіна раней), шанцы на вылучэнне крэдыту высокія. Што заканамерна, паколькі Беларусь з’яўляецца акуратным пазычальнікам і саюзнікам.
Нягледзячы на адносную важнасць двухбаковага парадку дня, дэвальвацыя расейскага рубля і праблемы расейскай эканомікі (то-бок сферы, якія не з’яўляюцца прадметам узгадненняў двухбаковых адносін) уздзейнічаюць на беларускую эканоміку значна мацней. Гэта рэзка пагаршае і экспартныя магчымасці беларускіх прадпрыемстваў, і ўмовы рэфінансавання іх даўгоў, якія былі ўзгодненыя месяцам раней з расейскім Ашчадным банкам.
