Еўропа абмяркоўвае шосты пакет санкцый, які ўключае энергетыку
Еўропа абмяркоўвае шосты раунд санкцый супраць Расеі, уключаючы ўдар па расейскім энергетычным рынку. Пра гэта заявіў Еўракамісар па гандлі Валдзіс Дамброўскіс і міністр фінансаў Літвы Гінтары Скайстэ, піша CNN.
Па словах Дамброўскіса, адно з пытанняў тычыцца нафтавага эмбарга. Абмяркоўваліся „разумныя санкцыі”, якія могуць уключаць тарыфы, а не поўнае эмбарга.
Гінтары Скайстэ паведаміла, што абмеркавала магчымы наступны пакет санкцый з намеснікам міністра фінансаў ЗША Уолі Адэема.
„Мы заўсёды прапануем уключыць у санкцыі энергетычны сектар, асабліва нафту, а таксама дадатковыя санкцыі ў дачыненні да фінансавага сектара Расеі„, — сказала Скайстэ.
Паводле яе слоў, для таго, каб санкцыі мелі эфект, яны павінны быць скаардынаваны.
„Калі мы не дамовімся аб санкцыях разам, Злучаныя Штаты з усімі заходнімі саюзнікамі, гэта не спрацуе„, – сказала яна.
Дамброўскіс сказаў, што «тэхнічна, зацвярджэнне санкцый можа прайсці вельмі хутка і зроблена на працягу аднаго-двух дзён».
Скайстэ адзначыла, што пакуль рана казаць аб тым, калі будзе дасягнута пагадненне па наступным раўндзе санкцый. Паводле яе слоў, у санкцый ёсць як кароткатэрміновая, так і доўгатэрміновая мэта: прыцягнуць прэзідэнта Расеі Уладзіміра Пуціна за стол перагавораў і аслабіць эканоміку Расеі, каб яна не змагла ўзмацніць свае ўзброеныя сілы.
Дамброўскіс сказаў, што важна, каб існуючыя санкцыі сапраўды выконваліся, адзначыўшы, што яны працуюць з краінамі — членамі ЕС, а таксама з шырокай міжнароднай супольнасцю.
І Скайсце, і Дамброўскіс выказалі занепакоенасць з нагоды будучых мэт Пуціна, калі яго не атрымаецца рашуча спыніць ва Украіне.
