Гарадзеншчына: колькасць беспрацоўных павялічылася ўдвая
Цягам 2015 года колькасць афіцыйна зарэгістраваных беспрацоўных у Гарадзенскай вобласці павысілася амаль удвая і склала 5 тысяч 400 чалавек. Найбольш небяспечна сітуацыя выглядае ў такіх гарадах як Гародня, Ліда і Слонім. Дадзеныя абласнога ўпраўлення статыстыкі сведчаць пра тое, што на сто вакансій прэтэндуе 117 чалавек.
Як зазначае намеснік старшыні ўпраўлення па працы, занятасці і сацыяльнай абароне насельніцтва Гарадзенскага гарвыканкама Аксана Флёрка, праблема беспрацоўя застаецца адной з самых вострых у грамадстве:
– Ідзе аптымізацыя кадраў і пераразмеркаванне працоўнай сілы. Наглядаецца ўсплеск рэгістрацыі беспрацоўных і напружанасць на рынку працы. Асноўная праблемы сёння – гэта праблемы мужчынскай занятасці.
За мінулы год на ўлік у цэнтрах занятасці Гарадзенскай вобласці было пастаўлена больш за 35 тысяч чалавек. Беспрацоўнымі прызнана амаль 24 тысячы. Сярэдні памер штомесячнай грашовай дапамогі для такіх асобаў складае ў сярэднім дзевяць даляраў.
Беларускае Радыё Рацыя
Фота newsbel.by
Глядзіце таксама
