Гарадзеншчыну „залівае” расейскі алкаголь
Падатковая інспекцыя Гарадзенскай вобласці на працягу года канфіскавала больш за 9 тон кантрабанднай алкагольнай прадукцыі. Гэта ў два разы перавышае мінулагоднія паказчыкі.
Падвышэнне выпадкаў канфіскацыі безакцызнай гарэлкі і спіртных напояў тлумачыцца актывізацыяй алкагольнага “чорнага” рынку – на Гарадзеншчыне ў бягучым годзе выяўлена амаль дзвесце парушэнняў заканадаўства.
Як зазначае старшыня абласной падатковай інспекцыі Лідзія Сямашка, з’ява выклікана шэрагам прычынаў як унутранага, так і знешняга характару:
– На нашу гарэлачную прадукцыю, з улікам павелічэння акцыза, павялічылася і цана. Але ў нашу Рэспубліку, у нашу Гарадзенскую вобласць у апошні час паступае прадукцыя расейскай вытворчасці і адпаведна без расейскіх акцызных марак.
У большасці выпадкаў нелегальны алкаголь, выяўлены на тэрыторыі Гарадзеншчыны – расейскага паходжання. Паводле лабараторных даследаванняў безакцызная прадукцыя небяспечная для здароўя.
Агульная сума штрафаў, накладзеных на грамадзян за захоўванне і распаўсюд кантрабанднага алкаголю, перавысіла 68 тысяч даляраў.
Беларускае Радыё Рацыя
